ಗಣಕಿಂಡಿ - ೦೯೯ (ಎಪ್ರಿಲ್ ೧೧, ೨೦೧೧)

ಅಂತರಜಾಲಾಡಿ

ಆಟೋರಿಕ್ಷ ದೂರುತಾಣ

ಆಟೋರಿಕ್ಷಗಳ ಕಿರಿಕಿರಿ ಯಾರಿಗೆ ಅನುಭವವಾಗಿಲ್ಲ? ಹೇಳಿದ ಜಾಗಕ್ಕೆ ಬರುವುದಿಲ್ಲ, ಮೀಟರ್ ಹಾಕುವುದಿಲ್ಲ, ಹಾಕಿದರೂ ಮೀಟರಿಗೆ ಎರಡು ಪಾಲು ಹಣ ಕೇಳುವುದು -ಹೀಗೆ ಹಲವಾರು ರೀತಿಯಲ್ಲಿ ನಾಗರಿಕರಿಗೆ ತೊಂದರೆ ಕೊಡುವ ಆಟೋರಿಕ್ಷ ಚಾಲಕರು ಬೇಕಾದಷ್ಟು ಮಂದಿ ಇದ್ದಾರೆ. ಪ್ರತಿ ಬಾರಿಯೂ ಸರಕಾರದ ಸೂಕ್ತ ಇಲಾಖೆಗೆ ಹೋಗಿ ದೂರು ಸಲ್ಲಿಸುವುದು ದೊಡ್ಡ ತಲೆನೋವಿನ ಕೆಲಸ. ದೂರು ಸಲ್ಲಿಸಿದರೂ ನಿಮ್ಮ ದೂರಿನ ಮೇಲೆ ಏನು ಕ್ರಮ ಕೈಗೊಂಡಿದ್ದಾರೆ ಎಂದು ತಿಳಿಯುವುದು ಹೇಗೆ? ಈ ಎಲ್ಲ ಸಮಸ್ಯೆಗಳಿಗೆ ಪರಿಹಾರವಾಗಿ ಒಂದು ಜಾಲತಾಣವಿದೆ. ಅದುವೇ auto404.org. ಈ ಜಾಲತಾಣದಲ್ಲಿ ಆಟೋರಿಕ್ಷದ ನೋಂದಣಿ ಸಂಖ್ಯೆ, ದಿನಾಂಕ, ಸ್ಥಳ, ದೂರಿನ ವಿವರ ಎಲ್ಲ ದಾಖಲಿಸಬಹುದು. ಆಗಾಗ ನೀವು ಇಲ್ಲಿಗೆ ಭೇಟಿ ನೀಡಿ ನಿಮ್ಮ ದೂರಿನ ಬಗ್ಗೆ ಏನು ಕ್ರಮ ಕೈಗೊಂಡಿದ್ದಾರೆ ಎಂದು ತಿಳಿಯಬಹುದು. ಈ ಜಾಲತಾಣಕ್ಕೆ ಸರಕಾದ ಮಾನ್ಯತೆ ಇದೆ.

ಡೌನ್‌ಲೋಡ್

ಗಣಕದಲ್ಲೇ ಲೆಗೋ ಮಾಡಿರಿ

ಮಕ್ಕಳಲ್ಲಿ ಬುದ್ಧಿಮತ್ತೆ ಹೆಚ್ಚಿಸಲು ತುಂಬ ಸಹಾಯಕಾರಿಯಾದ ಆಟ ಲೆಗೋ. ಇದರಲ್ಲಿ ಚಿಕ್ಕ ಚಿಕ್ಕ ಇಟ್ಟಿಗೆಗಳಿರುತ್ತವೆ. ಇವುಗಳನ್ನು ಜೋಡಿಸಿ ಹಲವು ನಮೂನೆಯ ಮಾದರಿಗಳನ್ನು ತಯಾರಿಸಬಹುದು. ಮನೆ, ಕಾರು, ಕಟ್ಟಡ, ಇತ್ಯಾದಿ ಏನೇನೆಲ್ಲಾ ಮಾಡಬಹುದು. ಇವು ತುಂಬ ದುಬಾರಿ. ಈಗ ಈ ಲೆಗೋ ಇಟ್ಟಿಗೆಗಳನ್ನು ಜೋಡಿಸಿ ಮಾದರಿಗಳನ್ನು ತಯಾರಿಸಲು ಡಿಜಿmಲ್ ಲೆಗೋ ಬಂದಿದೆ. ಇದನ್ನು ಗಣಕದಲ್ಲಿ ಇನ್‌ಸ್ಟಾಲ್ ಮಾಡಿಕೊಳ್ಳಬಹುದು. ನಂತರ ಗಣಕದಲ್ಲಿ ಮೌಸ್ ಬಳಸಿ ನಿಮಗಿಷ್ಟವಾದ ಮಾದರಿ ತಯಾರಿಸಬಹುದು. ಆಲೋಚನಾ ಶಕ್ತಿಯ ಬೆಳವಣಿಗೆಗೆ ಲೆಗೋ ಉತ್ತಮ ಆಟ. ಲೆಗೋ ಸೆಟ್ ಕೊಳ್ಳುವುದರಿಂದ ಮಾತ್ರವಲ್ಲ ಗಣಕದಲ್ಲಿ ಲೆಗೋ ಆಟ ಆಡುವದರಿಂದಲೂ ಬುದ್ಧಿಶಕ್ತಿ ಹೆಚ್ಚಿಸಕೊಳ್ಳಬಹುದು. ಈ ಡಿಜಿಟಲ್ ಲೆಗೋ ದೊರೆಯುವ ಜಾಲತಾಣದ ವಿಳಾಸ - ldd.lego.com.

e - ಸುದ್ದಿ

ನ್ಯಾಯಾಧೀಶರ ಬವಣೆ!

ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ಕಂಪೆನಿಗಳು ಒಬ್ಬರ ಮೇಲೆ ಒಬ್ಬರು ನ್ಯಾಯಾಲಯದಲ್ಲಿ ದಾವೆ ಹೂಡುತ್ತಲೇ ಇವೆ. ಇತ್ತೀಚೆಗೆ ತುಂಬ ಸುದ್ದಿಯಲ್ಲಿರುವುದು ಗೂಗ್ಲ್ ಕಂಪೆನಿಯ ಮೇಲೆ ಒರೇಕಲ್ ಕಂಪೆನಿ ಹೂಡಿದ ಜಾವಾ ತಂತ್ರಾಂಶ ಸಂಬಂಧಿ ದಾವೆ. ಸನ್ ಕಂಪೆನಿ ಜಾವಾ ತಂತ್ರಾಂಶ ತಯಾರಿಸಿತ್ತು. ಕಂಪೆನಿ ದಿವಾಳಿಯೇಳುವ ಸ್ಥಿತಿಯಲ್ಲಿದ್ದಾಗ ಅದರಲ್ಲಿದ್ದ ಬಹುಪಾಲು ಜಾವಾ ಪರಿಣತರು ಗೂಗ್ಲ್ ಕಂಪೆನಿ ಸೇರಿಕೊಂಡರು. ನಂತರ ಗೂಗ್ಲ್ ಕಂಪೆನಿ ಜಾವಾ ಆಧಾರಿತ ಆಂಡ್ರೋಯಿಡ್ ಎಂಬ ತಂತ್ರಾಂಶ ಬಿಡುಗಡೆ ಮಾಡಿತು. ಏತನ್ಮಧ್ಯೆ ಒರೇಕಲ್ ಕಂಪೆನಿ ಸನ್ ಕಂಪೆಯನ್ನು ಅದರ ಎಲ್ಲ ಪೇಟೆಂಟ್ ಸಹಿತ ಕೊಂಡುಕೊಂಡಿತು. ಅಂದರೆ ಜಾವಾ ಈಗ ಒರೇಕಲ್ ಕಂಪೆನಿಗೆ ಸೇರಿದ್ದಾಗಿದೆ. ಜಾವಾ ತಂತ್ರಾಂಶವನ್ನು ಬಳಸಿ ಆಂಡ್ರೋಯಿಡ್ ತಯಾರಿಸಿದ್ದಕ್ಕೆ ಒರೇಕಲ್ ಕಂಪೆನಿ ಗೂಗ್ಲ್ ಮೇಲೆ ದಾವೆ ಹೂಡಿದೆ. ಈ ಖಟ್ಲೆಯನ್ನು ವಿಚಾರಿಸುತ್ತಿರುವ ನ್ಯಾಯಾಧೀಶರಿಗೆ ಇತ್ತೀಚೆಗೆ ಜಾವಾ ಎಂದರೆ ಏನು ಎಂದು ತರಗತಿ ತೆಗೆದುಕೊಳ್ಳಲಾಗಿದೆ! ಅವರು ಜಾವಾ ಬಗ್ಗೆ ತಿಳಿದುಕೊಂಡು ತೀರ್ಪು ನೀಡಬೇಕಾಗಿದೆ. 

e- ಪದ

ಜಾವಾ (Java) - ಗಣಕ ಕ್ರಮವಿಧಿ ತಯಾರಿಯ ಒಂದು ಭಾಷೆ (programming language). ಇದನ್ನು ೧೯೯೫ರಲ್ಲಿ ಸನ್ ಕಂಪೆನಿ ತಯಾರಿಸಿ ಬಿಡುಗಡೆ ಮಾಡಿತು. ಈ ಭಾಷೆ ತುಂಬ ಜನಪ್ರಿಯ ಭಾಷೆ. ಇದರ ವೈಶಿಷ್ಟ್ಯವೇನೆಂದರೆ ಒಮ್ಮೆ ಒಂದು ಗಣಕದಲ್ಲಿ ತಯಾರಿಸಿದರೆ ಜಾವಾವನ್ನು ಬೆಂಬಲಿಸುವ ಯಾವ ಗಣಕದಲ್ಲಿ ಬೇಕಾದರೂ ಅದನ್ನು ಬಳಸಬಹುದು. ಇದರಲ್ಲಿ ಹಲವು ಪ್ರಭೇದಗಳಿವೆ.

e - ಸಲಹೆ

ಮೈಸೂರಿನ ಪ್ರಸನ್ನ ರಾವ್ ಅವರ ಪ್ರಶ್ನೆ: ನನ್ನ ಗಣಕದಲ್ಲಿ ತುಂಬ ತಾತ್ಕಾಲಿಕ ಪೈಲ್‌ಗಳಿವೆ (temporary files). ಇವುಗಳನ್ನು ಅಳಿಸುವುದು ಅಗತ್ಯವೇ?
ಉ: ಹೌದು. ಆಗಾಗ ನಿಮ್ಮ ಗಣಕ ಸ್ವಚ್ಛ ಮಾಡುತ್ತಿರುವುದು ಒಳ್ಳೆಯದು. ನೀವು ಇದೇ ಅಂಕಣದಲ್ಲಿ ಹಿಂದೊಮ್ಮೆ ಸೂಚಿಸಿದ್ದ ccleaner ತಂತ್ರಾಂಶವನ್ನು www.piriform.com/ccleaner ಜಾಲತಾಣದಿಂದ ಡೌನ್‌ಲೋಡ್ ಮಾಡಿಕೊಂಡು ಬಳಸಿ.

ಕಂಪ್ಯೂತರ್ಲೆ

ಕೋಲ್ಯ ಪತ್ರಿಕೆಯೊಂದಕ್ಕೆ ಲೇಖನ ಕಳುಹಿಸಲು ಗಣಕದಲ್ಲಿ ಬೆರಳಚ್ಚು ಮಾಡಿ ಸಿದ್ಧಪಡಿಸಿದ. ಅದನ್ನು ಗಣಕ (ಇಮೈಲ್) ಮೂಲಕವೇ ಕಳುಹಿಸತಕ್ಕದ್ದು ಎಂದು ಪತ್ರಿಕೆಯವರು ತಾಕೀತು ಮಾಡಿದ್ದರು. ಕೋಲ್ಯ ಅಂಚೆಕಛೇರಿಗೆ ಹೋಗಿ "ಇಮೈಲ್‌ಗೆ ಅಂಟಿಸುವ ಸ್ಟಾಂಪ್ ಕೊಡಿ" ಎಂದು ಕೇಳಿದ.

ಗಣಕಿಂಡಿ - ೦೯೮ (ಎಪ್ರಿಲ್ ೦೪, ೨೦೧೧)

ಅಂತರಜಾಲಾಡಿ

ಬಡವರಿಗೆ ಅಕ್ಕಿ ನೀಡಿ

ಪ್ರಪಂಚದಲ್ಲಿ ಕೋಟಿಗಟ್ಟಳೆ ಜನ ಬಡವರಿದ್ದಾರೆ. ಭಾರತದಲ್ಲೂ ಇದ್ದಾರೆ. ಬಡವರಿಗೆ ಆಹಾರ ದೊರಕಿಸಲು ಪ್ರಯತ್ನ ಮಾಡುವ ಸಂಸ್ಥೆಗಳು ಸಾವಿರಾರಿವೆ. ವಿಶ್ವ ಸಂಸ್ಥೆಯೂ ತನ್ನದೇ ಪ್ರಯತ್ನ ಮಾಡುತ್ತಿದೆ. ಹೀಗೆ ಕೆಲಸ ಮಾಡುವ ಸಂಸ್ಥೆಗಳು ಜನರಿಂದ ದೇಣಿಗೆ ಪಡೆದು ಕೆಲಸ ಮಾಡುತ್ತವೆ. ದೇಣಿಗೆ ಪಡೆಯುವುದು ಮಾತ್ರವಲ್ಲ, ನೀವು ರಸಪ್ರಶ್ನೆಗಳಿಗೆ ಉತ್ತರಿಸುವ ಮೂಲಕ ಸಹಾಯ ಮಾಡುವ ಜಾಲತಾಣವೊಂದಿದೆ. ಇದನ್ನು ವಿಶ್ವ ಸಂಸ್ಥೆಯ ಜಾಗತಿಕ ಆಹಾರ ಯೋಜನೆ ನಡೆಸುತ್ತಿದೆ. ಇದರಲ್ಲಿ ಕೆಲವು ರಸಪ್ರಶ್ನೆಗಳಿವೆ. ಇವುಗಳನ್ನು ಆಡುವ ಮೂಲಕ ನಿಮ್ಮ ಸಾಮಾನ್ಯ ಜ್ಞಾನ, ಇಂಗ್ಲಿಶ್ ಜ್ಞಾನ, ಮತ್ತು ಇತರೆ ವಿಷಯಗಳಲ್ಲಿಯ ಅರಿವು ಜಾಸ್ತಿ ಮಾಡಿಕೊಳ್ಳಬಹುದು. ಇಷ್ಟೇ ಅಲ್ಲ, ಪ್ರತಿ ಸರಿ ಉತ್ತರಕ್ಕೂ ಒಂದು ಕಾಳು ಅಕ್ಕಿಯನ್ನು ನಿಮ್ಮ ಪರವಾಗಿ ಬಡವರಿಗೆ ವಿಶ್ವ ಸಂಸ್ಥೆ ದಾನವಾಗಿ ನೀಡುತ್ತದೆ. ಈ ಜಾಲತಾಣದ ವಿಳಾಸ freerice.com. ಈ ಜಾಲತಾಣಕ್ಕೆ ದಿನಾ ಭೇಟಿ ನೀಡಿ, ರಸಪ್ರಶ್ನೆಗಳಲ್ಲಿ ಭಾಗವಹಿಸಿ, ನಿಮ್ಮ ಜ್ಞಾನಭಂಡಾರ ಬೆಳೆಸಿಕೊಳ್ಳಿ, ಜೊತೆಗೆ ಹಸಿದವರಿಗೆ ಅನ್ನ ನೀಡಿ ನೆರವಾಗಿ.

ಡೌನ್‌ಲೋಡ್

ಅತೀ ಅವಶ್ಯ ತಂತ್ರಾಂಶಗಳು

ಗಣಕದಲ್ಲಿ ಏನೇ ಕೆಲಸ ಮಾಡಬೇಕಿದ್ದರೂ ಕೆಲವು ತಂತ್ರಾಂಶಗಳು ಇರುವುದು ಅತೀ ಅವಶ್ಯ. ಇವುಗಳಲ್ಲಿ ಬ್ರೌಸರ್, ಗ್ರಾಫಿಕ್ಸ್, ವೈರಸ್ ನಿರೋಧಕ, ಇತ್ಯಾದಿ ಹಲವು ವಿಧಗಳಿವೆ. ಪ್ರತಿಯೊಂದರಲ್ಲು ಹಲವು ಉಚಿತ ತಂತ್ರಾಂಶಗಳು ಲಭ್ಯವಿವೆ. ಇವುಗಳನ್ನು ಆಯಾ ತಂತ್ರಾಂಶದ ಜಾಲತಾಣದಿಂದ ಡೌನ್‌ಲೋಡ್ ಮಾಡಿಕೊಳ್ಳಬಹುದು. ಸಮಸ್ಯೆ ಏನೆಂದರೆ ಈ ಎಲ್ಲ ತಂತ್ರಾಂಶಗಳನ್ನು ನೆನಪಿಟ್ಟುಕೊಳ್ಳುವುದು ಮತ್ತು ಅವುಗಳ ಜಾಲತಾಣ ವಿಳಾಸಗಳನ್ನೂ ನೆನಪಿಟ್ಟುಕೊಳ್ಳುವುದು. ಈ ಎಲ್ಲ ತಂತ್ರಾಂಶಗಳು ಒಂದೇ ಕಡೆ ಲಭ್ಯವಿದ್ದರೆ ಒಳ್ಳೆಯದಲ್ಲವೇ? ಹೌದು. ಅಂತಹ ಒಂದು ಜಾಲತಾಣವಿದೆ. ಅದರ ವಿಳಾಸ ninite.com. ಈ ಜಾಲತಾಣದಲ್ಲಿ ನಿಮಗೆ ಬೇಕಾದ ಎಲ್ಲ ತಂತ್ರಾಂಶಗಳನ್ನು ಆಯ್ಕೆ ಮಾಡಿ ಡೌನ್‌ಲೋಡ್ ಮಾಡಿಕೊಳ್ಳಬಹುದು.

e - ಸುದ್ದಿ

ಕೃತಿಚೌರ್ಯ ತಾಣಕ್ಕೆ ಕೊಂಡಿ ನೀಡಿದ್ದಕ್ಕೆ ಕಾರಾಗೃಹ

ಕೃತಿಚೌರ್ಯ ಮಾಡುವುದು ಅಪರಾಧ. ಇದುಎಲ್ಲರಿಗೂ ಗೊತ್ತಿರುವ ವಿಚಾರ. ಅದೇ ರೀತಿ ಕೃತಿಚೌರ್ಯ ಮಾಡಿ ಪುಸ್ತಕ, ತಂತ್ರಾಂಶ, ಸಂಗೀತ, ವೀಡಿಯೋ, ಇತ್ಯಾದಿಗಳನ್ನು ಅಂತರಜಾಲದಲ್ಲಿ ವಿತರಿಸುವುದೂ ಅಪರಾಧ. ಈ ರೀತಿ ಮಾಡುವ ಜಾಲತಾಣಗಳು ಹಲವಾರಿವೆ. ಸಾಮಾನ್ಯವಾಗಿ ಇಂತಹ ಜಾಲತಾಣಗಳು ಕಾನೂನು ವ್ಯವಸ್ಥೆ ಸರಿಯಿಲ್ಲದಿರುವ ದೇಶಗಳಲ್ಲಿರುತ್ತವೆ. ಆದರೆ ಅಮೆರಿಕದಿಂದ ವರದಿಯಾದ ಸುದ್ದಿಯೇ ಬೇರೆ. ಒಬ್ಬಾತ ತನ್ನ ಜಾಲತಾಣದಲ್ಲಿ ಇಂತಹ ಜಾಲತಾಣಗಳಿಗೆ ಕೊಂಡಿ ನೀಡಿದ್ದ. ಅಧಿಕಾರಿಗಳು ಈ ರೀತಿ ಸಂಪರ್ಕ ಕೊಂಡಿ ನೀಡುವುದು ಕೂಡ ಅಪರಾಧ ಎಂದು ತೀರ್ಮಾನಿಸಿದರು. ಈಗ ಆತನ ಜಾಲತಾಣವನ್ನು ಅಧಿಕಾರಿಗಳು ಮುಟ್ಟುಗೋಲು ಹಾಕಿಕೊಂಡಿದ್ದಾರೆ. ಆತನಿಗೆ ಐದು ವರ್ಷ ಕಾರಾಗೃಹವಾಸದ ಶಿಕ್ಷೆ ವಿಧಿಸಲಾಗಿದೆ. ಸದ್ಯಕ್ಕೆ ಶಿಕ್ಷೆಯ ವಿರುದ್ಧ ಮೇಲ್ಮನವಿ ಸಲ್ಲಿಸಲಾಗಿದೆ. ಅಂತಿಮ ತೀರ್ಮಾನವನ್ನು ಕಾಯಲಾಗುತ್ತಿದೆ.

e- ಪದ

ಅಂತಾರಾಷ್ಟ್ರೀಯ ಜಾಲತಾಣಸೂಚಿ (Internationalized Domain Names -IDN) -ಇಂಗ್ಲಿಶ್ ಹೊರತಾದ ಇತರೆ ಭಾಷೆಗಳಲ್ಲಿ ಜಾಲತಾಣದ ವಿಳಾಸ ಸೂಚಿಸುವುದು. ಉದಾಹರಣೆಗೆ ಕನ್ನಡಪ್ರಭ ಪತ್ರಿಕೆಯ ಜಾಲತಾಣ ಸೂಚಿ www.kannadaprabha.com ಎಂದಿದೆ. ಇಲ್ಲಿ ಕನ್ನಡಪ್ರಭ ಎಂಬುದನ್ನು ಕನ್ನಡ ಲಿಪಿಯಲ್ಲೇ ಸೂಚಿಸಿದರೆ ಅದು ಐಡಿಎನ್ ಆಗುತ್ತದೆ. ಹೀಗೆ ಮಾಡಲು ಎಲ್ಲ ಗಣಕ ಕಾರ್ಯಾಚರಣೆಯ ವ್ಯವಸ್ಥೆಗಳು ಮತ್ತು ಬ್ರೌಸರ್ ತಂತ್ರಾಂಶಗಳು ಯುನಿಕೋಡ್ ಶಿಷ್ಟತೆಯನ್ನು ಬಳಸಬೇಕಾಗುತ್ತದೆ. ಈಗ ಎಲ್ಲವೂ ಯುನಿಕೋಡ್ ಆಗಿರುವುದರಿಂದ ಬೇಕಿದ್ದವರೆಲ್ಲ ತಮ್ಮ ಭಾಷೆಯಲ್ಲೇ ಜಾಲತಾಣಸೂಚಿಗಳನ್ನು ಮಾಡಿಕೊಳ್ಳಬಹುದು. ಭಾರತೀಯ ಭಾಷೆಗಳ ವಿಷಯಕ್ಕೆ ಬಂದಾಗ ಕೆಲವು ಸಂದಿಗ್ಧಕಾರಿ ಸಂದರ್ಭಗಳನ್ನು ಪರಿಹರಿಸಿಕೊಳ್ಳಬೇಕಾಗಿದೆ. ಉಳಿದಂತೆ ನಮ್ಮ ಭಾಷೆಯಲ್ಲಿ ಡೊಮೈನ್ ಹೆಸರು ಮಾಡಿಕೊಳ್ಳಬಹುದು.

e - ಸಲಹೆ

ಸಂತೋಷ್ ನುಳಗೇರಿ ಅವರ ಪ್ರಶ್ನೆ: ನನಗೆ ನನ್ನ ಲ್ಯಾಪ್ಟಾಪ್ ನಲ್ಲಿ "ನುಡಿ" ತಂತ್ರಾಂಶವನ್ನು ಇನ್ಸ್ಟಾಲ್ ಮಾಡುವುದು ಅತಿ ಅವಶ್ಯವಾಗಿದೆ. ಆದರೆ ನನ್ನ ಆಪರೇಟಿಂಗ್ ಸಿಸ್ಟಂ "ವಿಂಡೋಸ್ 7" ಆಗಿದ್ದು ಅದರಲ್ಲಿ ನುಡಿ ತಂತ್ರಾಂಶದ ಇತ್ತೀಚಿನ ವರ್ಶನ್ ಕೂಡ ಇನ್ಸ್ಟಾಲ್ ಮಾಡಲು ಆಗುತ್ತಿಲ್ಲ. ಈ ತಂತ್ರಾಂಶವಿಲ್ಲದೆ ನನಗೆ KPSC ಅಥವಾ ಇನ್ಯಾವುದೇ ಸರಕಾರೀ ವೆಬ್ಸೈಟ್ ನಲ್ಲಿ ಕನ್ನಡದಲ್ಲಿ ದಾಖಲಾದ ಅಕ್ಷರಗಳನ್ನು ಓದಲು ಆಗುತ್ತಿಲ್ಲ. ದಯವಿಟ್ಟು ಈ ಸಮಸ್ಯಗೆ ಉಪಾಯ ಅಥವಾ ಅನ್ಯಮಾರ್ಗವಿದ್ದರೆ ತಿಳಿಸಿ.
ಉ: ನಾನೂ ಪ್ರಯತ್ನಿಸಿ ನೋಡಿದೆ. ಹೌದು, ೬೪ ಬಿಟ್ ವಿಂಡೋಸ್ ೭ ರಲ್ಲಿ ನುಡಿ ತಂತ್ರಾಂಶ ಕೆಲಸ ಮಾಡುವುದಿಲ್ಲ. ನಿಮಗೆ ಜಾಲತಾಣದಲ್ಲಿಯ ಮಾಹಿತಿಯನ್ನು ಓದುವುದು ಮಾತ್ರ ಅಗತ್ಯವಾದಲ್ಲಿ ನುಡಿ ಫಾಂಟ್‌ಗಳನ್ನು windows\fonts ಫೋಲ್ಡರ್‌ಗೆ ಪ್ರತಿ ಮಾಡಿಕೊಂಡು ಓದಬಹುದು. ನೀವು ವಿಂಡೋಸ್ ೭ ಪ್ರೊಫೆಶನಲ್ ಅಥವಾ ಅಲ್ಟಿಮೇಟ್ ಬಳಸುತ್ತಿರುವಿರಾದರೆ ಅದರಲ್ಲಿ XP Mode ಹಾಕಿಕೊಂಡು ಅದರೊಳಗೆ ನುಡಿ ತಂತ್ರಾಂಶ ಇನ್‌ಸ್ಟಾಲ್ ಮಾಡಿಕೊಂಡು ಕೆಲಸ ಮಾಡಬಹುದು.

ಕಂಪ್ಯೂತರ್ಲೆ

ಇನ್ನಷ್ಟು ಗಣಕ (ತ)ಗಾದೆಗಳು:

• ಅಂತರಜಾಲ ಸಂಪರ್ಕವಿಲ್ಲದ ಗಣಕವು ಆಹಾರ ಇಲ್ಲದ ರೆಫ್ರಿಜರೇಟರಿನಂತೆ
• ಖಡ್ಗಕ್ಕಿಂತ ಕೀಬೋರ್ಡ್ ಶಕ್ತಿಶಾಲಿ
• ಬಹುತೇಕ ವಾಹನಳಲ್ಲಿ ಆಗುವಂತೆ ಗಣಕ ಕೈಕೊಡಲೂ ಕೆಟ್ಟ ಡ್ರೈವರ್‌ಗಳೇ ಕಾರಣ

ಗಣಕಿಂಡಿ - ೦೯೭ (ಮಾರ್ಚ್ ೨೮, ೨೦೧೧)

ಅಂತರಜಾಲಾಡಿ

ಅಳಿದುಳಿದವರಿಗಾಗಿ

ಪ್ರಪಂಚದಲ್ಲಿ ಸಾವಿರಾರು ವರ್ಷಗಳ ಹಿಂದೆ ಎಲ್ಲೆಡೆ ಆದಿವಾಸಿಗಳೇ ಇದ್ದರು. ನಾಗರಿಕತೆ ಹೆಚ್ಚಿದಂತೆಲ್ಲ ಅವರೆಲ್ಲ ನಾಶವಾಗತೊಡಗಿದರು. ಆದರೆ ಈಗಲೂ ಪ್ರಪಂಚದ ಕೆಲವೆಡೆ ಕೆಲವೇ ಕೆಲವು ಆದಿವಾಸಿಗಳು ಉಳಿದುಕೊಂಡಿದ್ದಾರೆ. ಅವರು ಈಗಲೂ ಬೇಟೆಯಾಡಿ ಜೀವಿಸುತ್ತಿದ್ದಾರೆ. ಭಾರತದಲ್ಲಿ ಅಂಡಮಾನ್ ದ್ವೀಪದಲ್ಲಿ ಮಾತ್ರ ಇಂತಹ ಜನರು ಸುಮಾರು ೩೦೦ರಷ್ಟಿದ್ದಾರೆ. ಅವರಿದ್ದೆಡೆ ಹೋಗಬಾರದು ಎಂದು ಭಾರತ ಸರಕಾರವು ಕಾನೂನು ಮಾಡಿದೆ. ಇತ್ತೀಚೆಗೆ ಅಮೆಝಾನ್ ಕಾಡಿನಲ್ಲಿ ಅಂತಹ ಒಂದು ಜನಾಂಗದ ಪತ್ತೆಯಾಗಿದೆ. ಈ ರೀತಿಯ ಜನಾಂಗಗಳನ್ನು ಹಾಗೆಯೇ ಉಳಿಸಿಕೊಳ್ಳಬೇಕೆಂದು ಕೆಲವು ವಿಜ್ಞಾನಿಗಳು ವಾದಿಸುತ್ತಾರೆ. ಅವರನ್ನು ಹಾಗೆಯೇ ಉಳಿಸಿಕೊಳ್ಳಬೇಕೆಂದು ಹೋರಾಡುವವರ ಅಂತಾರಾಷ್ಟ್ರೀಯ ಸಂಘದ ಜಾಲತಾಣ www.survivalinternational.org. ಆದಿವಾಸಿಗಳ ಛಾಯಾಚಿತ್ರಗಳು, ಮಾಹಿತಿಗಳು ಹಾಗೂ ವೀಡಿಯೋಗಳು ಈ ಜಾಲತಾಣದಲ್ಲಿವೆ. ಇವರ ಕೆಲಸಕಾರ್ಯಗಳಿಗೆ ನೀವು ಯಾವ ರೀತಿ ಸಹಾಯ ಮಾಡಬಹುದು ಎಂಬ ವಿವರಗಳು ಜಾಲತಾಣದಲ್ಲಿವೆ.

ಡೌನ್‌ಲೋಡ್

ತುಂಡುಪದ ನಿಘಂಟು

ಇಂಗ್ಲಿಶ್ ಭಾಷೆಯಲ್ಲಿ ಬರೆಯುವಾಗ ಅಥವಾ ಬೆರಳಚ್ಚು ಮಾಡುವಾಗ ಒಂದು ದೀರ್ಘವಾದ ಪದವನ್ನು ಕೆಲವೊಮ್ಮೆ ತುಂಡು ಮಾಡಿ ಎರಡನೆಯ ಸಾಲಿನಲ್ಲಿ ಬರೆಯುವ ವಾಡಿಕೆಯಿದೆ. ಹೀಗೆ ಬರೆಯುವಾಗ ಮೊದಲನೆಯ ಸಾಲಿನ ಕೊನೆಯಲ್ಲಿ ಒಂದು ಚಿಕ್ಕ ಅಡ್ಡಗೆರೆ ಹಾಕುತ್ತೇವೆ. ಈ ಅಡ್ಡಗೆರೆಗೆ ಇಂಗ್ಲಿಶ್‌ನಲ್ಲಿ hyphen ಎನ್ನುತ್ತಾರೆ. ಹೀಗೆ ಪದಗಳನ್ನು ಎಲ್ಲೆಂದರಲ್ಲಿ ತುಂಡು ಮಾಡಲಾಗುವುದಿಲ್ಲ. ದೊಡ್ಡ ಪದಗಳನ್ನು ಎಲ್ಲೆಲ್ಲಿ ಯಾವ ಯಾವ ರೀತಿಯಲ್ಲಿ ತುಂಡು ಮಾಡಬಹುದು ಎಂದು ತಿಳಿಸಲು ನಿಘಂಟು ಇದೆ. ಈ ನಿಘಂಟನ್ನು ಬಹುತೇಕ ಎಲ್ಲ ಪುಟವಿನ್ಯಾಸದ ತಂತ್ರಾಂಶಗಳು ಬಳಸುತ್ತವೆ. ಇಂತಹ ಒಂದು ನಿಘಂಟು (hyphenation dictionary) ಉಚಿತವಾಗಿ ಬೇಕಾಗಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ bit.ly/gewezj. ಕನ್ನಡಕ್ಕೆ ಇಂತಹ ನಿಘಂಟನ್ನು ಯಾರೂ ಇದುತನಕ ತಯಾರು ಮಾಡಿದಂತಿಲ್ಲ. ಬಹುಶಃ ಇದಕ್ಕೆ ನಮ್ಮ ಭಾಷೆಯ ವೈಶಿಷ್ಟ್ಯವೂ ಕಾರಣವಿರಬಹುದು. ಕನ್ನಡ ಭಾಷೆಗೆ ಗಣಕ ಬಳಸಿ ಏನಾದರೂ ಸಹಾಯ ಮಾಡಬೇಕು ಎಂಬ ತುಡಿತವಿರುವವರು ಈ ಕೆಲಸ ಕೈಗೆತ್ತಿಕೊಳ್ಳಬಹುದು.

e - ಸುದ್ದಿ

ಎರಡು ಮದುವೆಯಾದವ ಫೇಸ್‌ಬುಕ್‌ನಿಂದಾಗಿ ಸಿಕ್ಕಿಬಿದ್ದ

ಎರಡು ಮದುವೆಯಾದವ ಫೇಸ್‌ಬುಕ್‌ನಿಂದಾಗಿ ಸಿಕ್ಕಿಬಿದ್ದ ಕಥೆ ಅಮೆರಿಕದಿಂದ ವರದಿಯಾಗಿದೆ. ಅಲ್ಲಿಯ ರಿಚರ್ಡ್ ಬಾರ್ಟನ್ ಎಂಬಾತ ಮೊದಲನೆಯ ಹೆಂಡತಿಯಿಂದ ವಿಚ್ಛೇದನ ಪಡೆಯುವ ಬಗ್ಗೆ ಮಾತನಾಡಿದ್ದ. ಆಕೆಯೂ ಒಪ್ಪಿದ್ದಳು. ಆದರೆ ಆತ ಕಾನೂನಿನ ಪ್ರಕಾರ ಮಾಡಬೇಕಾದ ಎಲ್ಲ ಕೆಲಸಗಳನ್ನು ಮಾಡಿರಲಿಲ್ಲ. ನಂತರ ಆತ ಆಕೆಯ ಬದುಕಿನಿಂದ ನಾಪತ್ತೆಯಾಗಿದ್ದ. ಆಕೆಯನ್ನು ಆತನ ಫೇಸ್‌ಬುಕ್ ಪುಟದಿಂದ ಆತ ತೆಗೆದುಹಾಕಿದ್ದ. ಆದರೂ ವರ್ಷಗಳ ಬಳಿಕ ಆಕೆ ಫೇಸ್‌ಬುಕ್‌ನಲ್ಲಿ ಆಕೆಯ ಸ್ನೇಹಿತರ ಸ್ನೇಹಿತರ, ಹಾಗೂ ಆತನ ಸ್ನೇಹಿತರ ಸ್ನೇಹಿತರ ಪುಟಗಳನ್ನು ಸುಮ್ಮನೆ ಜಾಲಾಡುತ್ತಿದ್ದಾಗ ಆತ ಇನ್ನೊಂದು ಮದುವೆಯಾಗಿರುವುದು ಪತ್ತೆಯಾಯಿತು. ಒಬ್ಬರ ಪುಟದಲ್ಲಿ ಆತನ ಎರಡನೆಯ ಮದುವೆಯ ಫೋಟೋಗಳಿದ್ದವು. ಆಕೆ ಪೋಲೀಸರಿಗೆ ದೂರು ನೀಡಿದಳು. ಪೋಲೀಸರು ಆತನನ್ನು ಬಂಧಿಸಿದರು.

e- ಪದ

ಅಪ್ಲಿಕೇಶನ್ ಸಾಫ್ಟ್‌ವೇರ್ (application software): ಆನ್ವಯಿಕ ತಂತ್ರಾಂಶ. ನಿರ್ದಿಷ್ಟ ಆವಶ್ಯಕತೆಗೆ ಅನುಗುಣವಾಗಿ ಅಭಿವೃದ್ಧಿಪಡಿಸಿದ ತಂತ್ರಾಂಶ. ಉದಾ: ವೇತನ ನಿರ್ವಹಣೆ, ಬಸ್, ರೈಲುಗಳಲ್ಲಿ ಸ್ಥಳ ಕಾಯ್ದಿರಿಸುವಿಕೆ ಇತ್ಯಾದಿ.

e - ಸಲಹೆ

ಸತೀಶ ಅವರ ಪ್ರಶ್ನೆ: ಕೆಲವು ಫೋಟೋ ವಿನಿಮಯ ಜಾಲತಾಣಗಳಲ್ಲಿ ಕಂಡುಬರುವ ಛಾಯಾಚಿತ್ರಗಳನ್ನು ಪ್ರತಿ ಮಾಡಿಕೊಳ್ಳಲು ಆಗುವುದಿಲ್ಲ. ನನಗೆ ಅಂತಹ ಚಿತ್ರಗಳನ್ನು ಪ್ರತಿಮಾಡಿಕೊಳ್ಳಬೇಕಾಗಿದೆ. ಇದಕ್ಕಾಗಿ ಯಾವುದಾದರೂ ತಂತ್ರಾಂಶ ಇದೆಯೇ?
ಉ: bluefive.pair.com/snapshot.htm ಜಾಲತಾಣದಲ್ಲಿ ದೊರೆಯುವ ತಂತ್ರಾಂಶ ಬಳಸಿ. ಇದು ಒಂದು screencapture ತಂತ್ರಾಂಶ. ಅಂದರೆ ಪರದೆಯ ಯಾವ ಭಾಗವನ್ನು ಬೇಕಾದರೂ ಪ್ರತಿ ಮಾಡಿಕೊಂಡು ಯಾವುದಾದರೂ ಗ್ರಾಫಿಕ್ಸ್ ತಂತ್ರಾಂಶಕ್ಕೆ ಪ್ರತಿ ಮಾಡಿಕೊಳ್ಳಬಹುದು. ನೆನಪಿಡಿ. ಜಾಲತಾಣಗಳಲ್ಲಿ ನೀಡಿರುವ ಚಿತ್ರಗಳನ್ನು ಪ್ರತಿಮಾಡಿಕೊಳ್ಳುವುದೂ ಕಾನೂನು ಪ್ರಕಾರ ಅಪರಾಧವಾಗಬಹುದು. ಜಾಲತಾಣದಲ್ಲಿ ನೀಡಿರುವ ಪರವಾನಗಿ ಸೂಚನೆಯನ್ನು ಓದಿಕೊಳ್ಳಿ.

ಕಂಪ್ಯೂತರ್ಲೆ

ಕೆಲವು ಹಳೆಯ ಗಣಕ (ತ)ಗಾದೆಗಳು:
“ತಪ್ಪು ಮಾಡುವುದು ಮನುಷ್ಯ ಸ್ವಭಾವ. ಮಾಡಿದ ತಪ್ಪಿಗೆ ಗಣಕವನ್ನು ದೂರುವುದು ನೌಕರ ಸ್ವಭಾವ.”
“ಪ್ರಥಮ ಪ್ರಯತ್ನದಲ್ಲಿ ಯಶಸ್ವಿಯಾಗದಿದ್ದಲ್ಲಿ ಗಣಕವನ್ನು ದೂರು.”
“ಪ್ರೋಗ್ರಾಮ್‌ಗಿಂತ ಸ್ರ್ಕೀನ್‌ಸೇವರ್ ದೊಡ್ಡದು.”
“ಕೆಲಸ ಗೊತ್ತಿಲ್ಲದವನಿಗೆ ಗಣಕ ಸರಿಯಿಲ್ಲ.”
“ಮೆಮೊರಿಯಿದ್ದಷ್ಟೆ ಪ್ರೋಗ್ರಾಮ್ ಮಾಡು.”

ಗಣಕಿಂಡಿ - ೦೯೬ (ಮಾರ್ಚ್ ೨೧, ೨೦೧೧)

ಅಂತರಜಾಲಾಡಿ

ಇಂಗ್ಲಿಶ್ ಕಲಿಯಬೇಕೇ?

ಇಂಗ್ಲಿಶ್ ಭಾಷೆ ಕಲಿಯಬೇಕೇ? ಅದಕ್ಕಾಗಿ ಸಾವಿರಾರು ಜಾಲತಾಣಗಳಿವೆ. ಹೆಚ್ಚಿನವು ನಾಮಪದ, ಕ್ರಿಯಾಪದ, ವ್ಯಾಕರಣ -ಹೀಗೆ ವಿವರಣೆ ನೀಡುತ್ತ ಹೋಗುತ್ತವೆ. ಇಂಗ್ಲಿಶ್ ಭಾಷೆಯ ಒಂದು ದೊಡ್ಡ ದೌರ್ಬಲ್ಯವೆಂದರೆ ಉಚ್ಚರಣೆ. ಒಂದು ಪದವನ್ನು ಯಾವ ರೀತಿ ಉಚ್ಚರಿಸುವುದು ಎಂದು ಯಾರಾದರು ಹೇಳಿಕೊಡುವ ತನಕ ಅದನ್ನು ಯಾವ ರೀತಿ ಉಚ್ಚರಿಸಬೇಕು ಎಂದು ತಿಳಿಯುವುದಿಲ್ಲ. ಕೆಲವೊಮ್ಮೆ ಒಂದೇ ಪದವನ್ನು ಸಂದರ್ಭಕ್ಕೆ ಅನುಸರಿಸಿ ಬೇರೆ ಬೇರೆ ರೀತಿ ಉಚ್ಚರಿಸಲಾಗುತ್ತದೆ. ಪದಗಳು ಮಾತ್ರವಲ್ಲ, ವಾಕ್ಯಗಳನ್ನು ಉಚ್ಚರಿಸುವ ರೀತಿಯನ್ನೂ ಯಾರಾದರೂ ಹೇಳಿ ತೋರಿಸಬೇಕಾಗುತ್ತದೆ. ಇವೆಲ್ಲವನ್ನು ವೀಡಿಯೋಗಳ ಮೂಲಕ ವಿವರಿಸುವ ಜಾಲತಾಣ www.engvid.com. ಇಲ್ಲಿರುವ ವೀಡಿಯೋ ಪಾಠಗಳು ಪ್ರಾರಂಭಿಕ, ಮಧ್ಯಮ, ಉನ್ನತ -ಹೀಗೆ ಹಲವು ಹಂತಗಳಲ್ಲಿವೆ.

ಡೌನ್‌ಲೋಡ್

ಚಿತ್ರಸಂಚಾಲಕರಾಗಿ

ಚಿತ್ರಸಂಚಲನೆ ಅರ್ಥಾತ್ ಅನಿಮೇಶನ್ ನೋಡದವರಾರು? ಅಂತರಜಾಲದಲ್ಲಂತೂ ಯಾವ ಜಾಲತಾಣ ತೆರೆದರೂ ಅಲ್ಲೊಂದು ಫ್ಲಾಶ್ ಅನಿಮೇಶನ್ ಕಂಡುಬರುತ್ತದೆ. ಈ ಫ್ಲಾಶ್ ಅನಿಮೇಶನ್ ತಯಾರಿಸಲು ಅಡೋಬ್ ಕಂಪೆನಿಯವರ ದುಬಾರಿ ತಂತ್ರಾಂಶ ಇದೆ. ತಯಾರಾದ ಫೈಲ್ ಅನ್ನು ಪ್ಲೇ ಮಾಡಲು ಸಾಮಾನ್ಯವಾಗಿ ಎಲ್ಲ ಜಾಲತಾಣ ವೀಕ್ಷಕ ತಂತ್ರಾಂಶಗಳಿಗೆ (ಬ್ರೌಸರ್) ಅಗತ್ಯ ಪ್ಲಗ್‌ಇನ್ ಎಲ್ಲರೂ ಹಾಕಿಕೊಂಡಿರುತ್ತಾರೆ. ಈ ಚಿತ್ರಸಂಚಲನೆ ನೀವೇ ತಯಾರಿಸಬೇಕು ಎಂಬ ಆಸೆಯೇ? ಹಾಗಿದ್ದರೆ ನಿಮಗಾಗಿ ಒಂದು ಉಚಿತ ತಂತ್ರಾಂಶ ಲಭ್ಯವಿದೆ. ಅದು ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ synfig.org.

e - ಸುದ್ದಿ

ಸ್ಟಾಂಪ್ ಬದಲಿಗೆ ಎಸ್‌ಎಂಎಸ್

ಸ್ವೀಡನ್‌ನಲ್ಲಿ ಇನ್ನು ಮುಂದೆ ಅಂಚೆ ಸ್ಟಾಂಪ್‌ಗಳು ನಾಪತ್ತೆಯಾಗಲಿವೆ. ಅವರು ಒಂದು ಹೊಸ ಪ್ರಯೋಗ ಮಾಡುತ್ತಿದ್ದಾರೆ. ಯಾರಿಗಾದರೂ ಅಂಚೆ ಸ್ಟಾಂಪ್ ಬೇಕಾಗಿದ್ದಲ್ಲಿ ಅಂಚೆ ಕಚೇರಿಗೆ ಒಂದು ಎಸ್‌ಎಂಎಸ್ ಕಳುಹಿಸಬೇಕು. ಅಂಚೆ ಕಚೇರಿಯಿಂದ ಒಂದು ಸಂಖ್ಯೆ ಎಸ್‌ಎಂಎಸ್ ಮೂಲಕ ಬರುತ್ತದೆ. ಅಂಚೆ ಲಕೋಟೆಯ ಮೇಲೆ ಆ ಸಂಖ್ಯೆಯನ್ನು ಬರೆದರೆ ಸಾಕು. ಫೋನಿನಲ್ಲಿ ಮೊಬೈಲ್ ಬ್ಯಾಂಕಿಂಗ್ ವ್ಯವಸ್ಥೆ ಇದ್ದರೆ ಮಾತ್ರ ಈ ಸವಲತ್ತನ್ನು ಬಳಸಬಹುದು. ಡೆನ್‌ಮಾರ್ಕ್‌ನಲ್ಲಿ ಈಗಾಗಲೇ ಇಂತಹ ವ್ಯವಸ್ಥೆ ಜಾರಿಯಲ್ಲಿದೆ. ಅಂಚೆ ಸ್ಟಾಂಪ್‌ಗೆ ಎಂಜಲು ಹಾಕಿ ಅಂಟಿಸುವ ಕಾಲ ಮುಗಿಯುತ್ತ ಬಂತು.

e- ಪದ

ರೋಬೋಟ್ ಅಥವಾ ಬೋಟ್ (robot or bot) - ಮಾನವರ ಹಸ್ತಕ್ಷೇಪವಿಲ್ಲದೆ ತಾನೇ ಕೆಲಸ ಮಾಡುವ ಪ್ರೋಗ್ರಾಮ್. ಸಾಮಾನ್ಯವಾಗಿ ಇವುಗಳನ್ನು ಅಂತರಜಾಲ ಶೋಧಕಗಳು ಬಳಸುತ್ತವೆ. ಎಲ್ಲ ಜಾಲತಾಣಗಳಿಗೆ ಭೇಟಿ ನೀಡಿ ಅಲ್ಲಿ ನೀಡಿರುವ ಸೂಚಿ ಪದಗಳನ್ನು ಬಳಸಿ ಜಾಲತಾಣಗಳ ಯಾದಿ ಅಥವಾ ಸೂಚಿಯನ್ನು ತಯಾರಿಸಲು ಇವುಗಳ ಬಳಕೆ ಆಗುತ್ತದೆ. ಇನ್ನು ಕೆಲವು ಟ್ವಟ್ಟರ್‌ನಂತಹ ಜಾಲತಾಣಗಳಲ್ಲಿ ತಮ್ಮದೇ ಖಾತೆ ಹೊಂದಿ ಮಾತುಕಥೆಗಳನ್ನು ದಾಖಲಿಸುತ್ತಿರುತ್ತವೆ ಹಾಗೂ ಕೆಲವೊಮ್ಮೆ ಉತ್ತರವನ್ನೂ ನೀಡುತ್ತವೆ!
 
e - ಸಲಹೆ

ಪುನಿತ್ ಅವರ ಪ್ರಶ್ನೆ: ಯಾವುದೇ ಜಾಲತಾಣ ಯಾರ ಹೆಸರಿನಲ್ಲಿದೆ ಎಂದು ಪತ್ತೆಹಚ್ಚುವುದು ಹೇಗೆ?
ಉ: www.whois.net ಜಾಲತಾಣದ ಮೂಲಕ

ಕಂಪ್ಯೂತರ್ಲೆ

ಅಂತರಜಾಲ ದೇವಸ್ಥಾನದ ಅನುಕೂಲಗಳು-

• ಬಿಕ್ಷುಕರ ಕಾಟವಿಲ್ಲ
• ಚಪ್ಪಲಿ ಕಳವಾಗುವ ಭಯವಿಲ್ಲ

ಅನನುಕೂಲಗಳು-

• ಮಂಗಳಾರತಿ, ತೀರ್ಥ ದೊರೆಯುವುದಿಲ್ಲ
• ದೇವಸ್ಥಾನಕ್ಕೆ ಬಂದ ಇತರರನ್ನು ನೋಡಲು ಆಗುವುದಿಲ್ಲ

ಗಣಕಿಂಡಿ - ೦೯೫ (ಮಾರ್ಚ್ ೧೪, ೨೦೧೧)

ಅಂತರಜಾಲಾಡಿ

ದೃಷ್ಟಿಶಕ್ತಿ ವಂಚಿತರಿಗೆ
 
ಪ್ರಪಂಚದಲ್ಲಿ ದೃಷ್ಟಿಶಕ್ತಿಯಿಂದ ಪೂರ್ತಿಯಾಗಿ ಅಥವಾ ಸ್ವಲ್ಪ ವಂಚಿತರಾದವರು ತುಂಬ ಮಂದಿ ಇದ್ದಾರೆ. ಅದರಲ್ಲೂ ಭಾರತದಂತಹ ಬಡ(?) ದೇಶದಲ್ಲಿ ಅವರ ಸಂಖ್ಯೆ ಒಟ್ಟು ಜನಸಂಖ್ಯೆಗೆ ಅನುಪಾತ ಮಾಡಿ ನೋಡಿದರೆ ತುಂಬ ಹೆಚ್ಚು. ಇಂತಹವರುಗಳಲ್ಲಿ ಬಡವರ ಸಂಖ್ಯೆ ಹೆಚ್ಚು. ಅವರಿಗೆ ಬದುಕಲು ಸಹಾಯ ಮಾಡುವ ಒಂದು ಸಂಸ್ಥೆಯ ಜಾಲತಾಣ  www.visionaid.org. ಇವರು ದೃಷ್ಟಿಶಕ್ತಿ ವಂಚಿತರುಗಳಿಗೆ ಹಲವು ರೀತಿಯಲ್ಲಿ ತಮ್ಮ ಕಾಲಿನಲ್ಲಿ ನಿಂತುಕೊಳ್ಳುವಂತೆ ಮಾಡಲು ಅನುವು ಮಾಡಿಕೊಡುತ್ತಾರೆ. ಉದಾಹರಣೆಗೆ ಗಣಕ ಶಿಕ್ಷಣ. ಇಂತಹವರಿಗಾಗಿಯೇ ಇರುವ ತಂತ್ರಾಂಶಗಳನ್ನು ಬಳಸಿ ಅವರು ಶಿಕ್ಷಣ ನೀಡುತ್ತಾರೆ. ಇವರ ಕೆಲಸ ಕಾರ್ಯಗಳಲ್ಲಿ ನೀವು ಸಹಾಯ ಮಾಡಬಹುದು. ಅದು ಹೇಗೆ ಎಂಬ ವಿವರ ಜಾಲತಾಣದಲ್ಲಿದೆ.

ಡೌನ್‌ಲೋಡ್

ಧ್ವನಿ ಮೂಲಕ ಗಣಕ ಬಳಸಿ

ದೃಷ್ಟಿಶಕ್ತಿ ವಂಚಿತರಿಗೆ ಗಣಕ ಬಳಸಲು ಒಂದು ವಿಧಾನವೆಂದರೆ ಗಣಕದ ಪರದೆಯ ಮೇಲೆ ಮೂಡಿ ಬರುವ ಎಲ್ಲ ಅಕ್ಷರಗಳನ್ನು ಓದಿ ಹೇಳುವ ತಂತ್ರಾಂಶದ (screen-reader software) ಬಳಕೆ. ಇಂತಹ ವಾಣಿಜ್ಯಕ ತಂತ್ರಾಂಶಗಳು ಹಲವಾರಿವೆ. ಉಚಿತ ತಂತ್ರಾಂಶಗಳೂ ಇವೆ. ಅಂತಹ ಒಂದು ಉಚಿತ ಮತ್ತು ಮುಕ್ತ ತಂತ್ರಾಂಶ ದೊರೆಯುವ ಜಾಲತಾಣ www.nvda-project.org. ಇದು ಮೈಕ್ರೋಸಾಫ್ಟ್ ವಿಂಡೋಸ್‌ನಲ್ಲಿ ಕೆಲಸ ಮಾಡುತ್ತದೆ. ಇದನ್ನು ಬಳಸಲು eSpeak ಎಂಬ ಇನ್ನೊಂದು ತಂತ್ರಾಂಶ ಬೇಕು. ಅದು ದೊರೆಯುವ ಜಾಲತಾಣ espeak.sourceforge.net. ಈ ತಂತ್ರಾಂಶಗಳಲ್ಲಿ ಕನ್ನಡದ ಬಳಕೆ ಇನ್ನೂ ಅಷ್ಟೊಂದು ಸಮರ್ಪಕವಾಗಿ ಆಗಿಲ್ಲ. ಇದು ಮುಕ್ತ ತಂತ್ರಾಂಶವಾಗಿರುವುದರಿಂದ ಇದರಲ್ಲಿ ಕನ್ನಡ ಇನ್ನೂ ಪರಿಪೂರ್ಣವಾಗಿ ಬಳಕೆಗೆ ಬಂದಿಲ್ಲ ಎಂದರೆ ಅದಕ್ಕೆ ಕನ್ನಡಿಗರೇ ಹೊಣೆ.

e - ಸುದ್ದಿ

ಸೋಲಿಗೆ ಫೇಸ್‌ಬುಕ್ ಕಾರಣ?

ಅಮೆರಿಕದ ಮಿಚಿಗನ್ ರಾಜ್ಯದ ರಾಜಕಾರಣಿಯಬ್ಬರು ತಮ್ಮ ಸೋಲಿಗೆ ಫೇಸ್‌ಬುಕ್ ಕಾರಣವೆಂದು ದೂರಿರುವುದು ಮಾತ್ರವಲ್ಲ ಅದಕ್ಕಾಗಿ ನ್ಯಾಯಾಲಯದಲ್ಲಿ ದಾವೆ ಕೂಡ ಹೂಡಿದ್ದಾರೆ. ರಿಪಬ್ಲಿಕನ್ ಪಕ್ಷದ ಮೌಗ್ನಿ ಅವರು ಫೇಸ್‌ಬುಕ್‌ನಲ್ಲಿ ಖಾತೆ ತೆಗೆದು ಸಾವಿರಾರು ಹಿಂಬಾಲಕರನ್ನು ಪಡೆದು ಪ್ರಚಾರ ನಡೆಸಲು ಯೋಜನೆ ಹಾಕಿದ್ದರು. ಅವರು ತಮ್ಮ ಪುಟದ ತುಂಬ ತಮ್ಮ ವಿರೋಧಿಯ ಬಗ್ಗೆ ತೆಗಳಿಕೆಗಳನ್ನು ದಾಖಲಿಸಿದ್ದರು. ಆದರೆ ಫೇಸ್‌ಬುಕ್ ಅವರ ಪುಟವನ್ನೇ ತೆಗೆದುಹಾಕಿತು. ಈ ಕ್ರಮದಿಂದಾಗಿ ತಾನು ಚುನಾವಣೆಯಲ್ಲಿ ಸೋಲಬೇಕಾಯಿತು ಎಂದು ಅವರು ಫೇಸ್‌ಬುಕ್ ಮೇಲೆ ದಾವೆ ಹೂಡಿದ್ದಾರೆ.

e- ಪದ

ಐಎಸ್‌ಪಿ (ISP - Internet Service Provider) - ಅಂತರಜಾಲ ಸಂಪರ್ಕ ಸೇವೆ ನೀಡುವವರು. ನಿಗದಿತ ಹಣ ತೆಗೆದುಕೊಂಡು ಹಲವಾರು ವಿಧಾನಗಳ ಮೂಲಕ ಮನೆಗೆ, ಕಛೇರಿಗೆ ಅಥವಾ ಓಡಾಟದಲ್ಲಿರುವವರಿಗೆ ಅಂತರಜಾಲಕ್ಕೆ ಸಂಪರ್ಕ ನೀಡುತ್ತಾರೆ. ಈ ಸಂಪರ್ಕ ಡಯಲ್‌ಅಪ್, ಬ್ರ್ಯಾಡ್‌ಬ್ಯಾಂಡ್, ನಿಸ್ತಂತು (ವಯರ್‌ಲೆಸ್), ಕೇಬಲ್ -ಹೀಗೆ ಹಲವಾರು ವಿಧಾನಗಳಲ್ಲಿ ಯಾವುದಾದರೊಂದು ವಿಧಾನದಲ್ಲಿರಬಹುದು.
 
e - ಸಲಹೆ

ಶಿವಮೊಗ್ಗದ ಶ್ರೀಪಾದ ರಾವ್ ಅವರ ಪ್ರಶ್ನೆ: ಕನ್ನಡದಿಂದ ಇಂಗ್ಲಿಷ್ ಇಲ್ಲ ಬೇರೆ ಭಾಷೆಗೆ ಭಾಷಾಂತರ ತಂತ್ರಾಂಶ ಇದ್ದರೆ ಮಾಹಿತಿ ನೀಡಿ.
ಉ: ಸದ್ಯಕ್ಕೆ ಅಂತಹ ಪರಿಪೂರ್ಣ ತಂತ್ರಾಂಶ ಲಭ್ಯವಿಲ್ಲ.

ಕಂಪ್ಯೂತರ್ಲೆ

ಮನೆಯಾಕೆ: ಯಾಕೆ ಒಂದು ವಾರದಿಂದ ಕೆಲಸಕ್ಕೆ ಬಂದಿಲ್ಲ?
ಕೆಲಸದಾಕೆ: ನಾನು ಊರಲ್ಲಿರಲಿಲ್ಲ. ಅದನ್ನು ಫೇಸ್‌ಬುಕ್‌ನಲ್ಲೂ ದಾಖಲಿಸಿದ್ದೆ. ನಿಮ್ಮ ಯಜಮಾನರು ಅದನ್ನು ಓದಿ “ಆದಷ್ಟು ಬೇಗನೆ ವಾಪಾಸು ಬಾ, ನೀನಿಲ್ಲದೆ ಬೋರ್ ಆಗುತ್ತಿದೆ ಎಂದು ಕಮೆಂಟ್ ಕೂಡ ಹಾಕಿದ್ದರು”.

ಗಣಕಿಂಡಿ - ೦೯೪ (ಮಾರ್ಚ್ ೦೭, ೨೦೧೧)

ಅಂತರಜಾಲಾಡಿ

ಕಡತ ಪರಿವರ್ತಿಸಿ

ಹಲವಾರು ನಮೂನೆಯ ಫೈಲ್‌ಗಳು ಎಲ್ಲರಲ್ಲೂ ಇರುವುದು ಸಹಜ. ಉದಾಹರಣೆಗೆ ಹಾಡು (mp3), ವೀಡಿಯೋ (mp4, avi, flv), ವರ್ಡ್, ಪಿಡಿಎಫ್, ಇತ್ಯಾದಿ. ಇವುಗಳನ್ನು ಒಂದು ನಮೂನೆಯಿಂದ ಇನ್ನೊಂದಕ್ಕೆ ಬದಲಾಯಿಸಬೇಕಾಗಿರುತ್ತದೆ. ನಿಮ್ಮಲ್ಲಿ ಒಂದು ವೀಡಿಯೋ ತುಣುಕು flv ರೂಪದಲ್ಲಿರುವುದಾದರೆ ಅದನ್ನು ನೋಕಿಯಾ ಮೊಬೈಲ್‌ಗೆ ವರ್ಗಾಯಿಸಬೇಕಾದರೆ ಅದು 3gp ವಿಧಾನದಲ್ಲಿರಬೇಕಾಗುತ್ತದೆ. ಹೀಗೆ ಪರಿವರ್ತಿಸಲು ಹಲವು ತಂತ್ರಾಂಶಗಳಿವೆ. ಅವುಗಳನ್ನು ನಿಮ್ಮ ಗಣಕದಲ್ಲಿ ಅನುಸ್ಥಾಪಿಸದೆ ಅಂತರಜಾಲದ ಮೂಲಕವೇ ಯಾವ ಫೈಲ್ ಆಗಿರಲಿ ಅದನ್ನು ಒಂದು ರೂಪದಿಂದ ಇನ್ನೊಂದು ರೂಪಕ್ಕೆ ಪರಿವರ್ತಿಸಲು ಅನುವು ಮಾಡಿಕೊಡುವ ಜಾಲತಾಣ www.zamzar.com. ಇದು ಪರಿವರ್ತಿಸಿದ ಕಡತವನ್ನು ನಿಮ್ಮ ಇಮೈಲ್‌ಗೆ ಕಳುಹಿಸಿಕೊಡುತ್ತದೆ.


ಡೌನ್‌ಲೋಡ್

ನೋಕಿಯಾಟ

ಭಾರತದಲ್ಲಿ ಸದ್ಯದಲ್ಲಿ ಅತ್ಯಂತ ಹೆಚ್ಚು ಬಳಕೆಯಲ್ಲಿರುವ ಮೊಬೈಲ್ ಫೋನ್ ನೋಕಿಯ ಕಂಪೆನಿಯದು. ಇವರ ಫೋನ್‌ಗಳಲ್ಲಿ ನೂರಾರು ಮಾದರಿಗಳಿವೆ. ಅವುಗಳಿಗೆ ವಿವಿಧ ಗುಣವೈಶಿಷ್ಟ್ಯಗಳಿವೆ ಮತ್ತು ವಿವಿಧ ಗಾತ್ರದ ಪರದೆಗಳಿವೆ. ಅಂತೆಯೇ ಇವುಗಳಿಗಾಗಿ ತಯಾರಾದ ಸಾವಿರಾರು ಆಟಗಳಿವೆ. ಈ ಆಟಗಳನ್ನು ನಿಮ್ಮ ನೋಕಿಯ ಮೊಬೈಲ್ ಫೋನ್‌ಗೆ ಅಳವಡಿಸಿಕೊಳ್ಳಬೇಕಾಗಿದೆಯೇ? ಹಾಗಿದ್ದರೆ ನೋಕಿಯ ಫೋನ್‌ಗಳಿಗಾಗಿ ತಯಾರಾದ ಆಟಗಳಿಗೆಂದೇ ಒಂದು ಜಾಲತಾಣವಿದೆ. ಅದರ ವಿಳಾಸ - nokiagamez.com. ಇಲ್ಲಿಗೆ ಭೇಟಿ ನೀಡಿ ಆಟಗಳನ್ನು ನಿಮ್ಮ ಗಣಕಕ್ಕೆ ಡೌನ್‌ಲೋಡ್ ಮಡಿಕೊಂಡು ನಂತರ Nokia PC Suite ಎಂಬ ತಂತ್ರಾಂಶದ ಮೂಲಕ ಫೋನ್‌ಗೆ ವರ್ಗಾಯಿಸಿ ಬಳಸಬೇಕು. ಈ ಜಾಲತಾಣದಲ್ಲಿ ಆಟಗಳಲ್ಲದೆ ಇತರೆ ಕೆಲವು ಉಪಯುಕ್ತ ತಂತ್ರಾಂಶ, ಸ್ಕ್ರೀನ್‌ಸೇವರ್ ಹಾಗೂ ಲೇಖನಗಳಿವೆ.

e - ಸುದ್ದಿ

ಮಿಥ್ಯಾ ತರಳೆಯ ನಂಬಿ...

ಇಲ್ಲದ ಹುಡುಗಿಯನ್ನು ಉಳಿಸಲು ೨ ಲಕ್ಷ ಡಾಲರು ಹಣ ಕಳೆದುಕೊಂಡವನೊಬ್ಬನ ಕಥೆ ಅಮೆರಿಕದ ಇಲಿನಾಯ್ಸ್‌ನಿಂದ ವರದಿಯಾಗಿದೆ. ಆತ ಅಂತರಜಾಲದ ಮೂಲಕ ಹುಡುಗಿಯೊಬ್ಬಳನ್ನು ಸ್ನೇಹಿತೆಯಾಗಿ ಮಾಡಿಕೊಂಡಿದ್ದ. ಆಕೆಯೊಡನೆ ಗೆಳೆತನ ಮುಂದುವರಿಯಿತು. ಎರಡು ವರ್ಷಗಳ ಕಾಲದಲ್ಲಿ ಆತ ಆಕೆಯನ್ನು ಎಷ್ಟು ನಂಬಿದ್ದನೆಂದರೆ ಆಕೆ ಕಷ್ಟದಲ್ಲಿದ್ದೇನೆಂದು ಹೇಳಿದ್ದು ನಂಬಿ ಆಗಾಗ ಹಣ ನೀಡುತ್ತಿದ್ದ. ಕೊನೆಗೊಮ್ಮೆ ಆಕೆ ನಾಪತ್ತೆಯಾದಳು. ಆಕೆಯನ್ನು ಯಾರೋ ಅಪಹರಿಸಿದ್ದಾರೆ ಎಂದು ಆತ ಪೋಲೀಸರಿಗೆ ದೂರು ನೀಡಿದ. ಪೋಲೀಸರ ಕಾರ್ಯಾಚರಣೆಯಲ್ಲಿ ಪತ್ತೆಯಾದ ವಿಷಯವೇನೆಂದರೆ ಅಂತಹ ಹುಡುಗಿ ಇರಲೇ ಇಲ್ಲ! ಅಂತರಜಾಲದಲ್ಲಿ ಭೇಟಿಯಾದವರನ್ನು ಪೂರ್ತಿಯಾಗಿ ನಂಬುವವರಿಗೆ ಇಲ್ಲಿದೆ ಒಂದು ಪಾಠ.

e- ಪದ

ಆಸ್ಕಿ (ASCII - American Standard Code for Information Interchange) - ಮಾಹಿತಿ ವಿನಿಮಯಕ್ಕಾಗಿ ಅಮೇರಿಕದ ಶಿಷ್ಟ ಸಂಕೇತ. ೮ ಬಿಟ್‌ಗಳನ್ನು ಬಳಸಿ ಮಾಹಿತಿಯನ್ನು ಶೇಖರಿಸಿಡಲು ಪ್ರಪಂಚಾದ್ಯಂತ ಎಲ್ಲ ಗಣಕಗಳೂ ಇಂಗ್ಲೀಷ್ ಭಾಷೆಯ ಎಲ್ಲ ಅಕ್ಷರ, ಅಂಕೆ, ಬರೆವಣಿಗೆಯ ಚಿಹ್ನೆ, ಇತ್ಯಾದಿಗಳಿಗೆ ನಿರ್ದಿಷ್ಟ ಸಂಕೇತ ಬಳಸುತ್ತಾರೆ. ಇದೇ ಆಸ್ಕಿ. ಎಲ್ಲರೂ ಒಂದೇ ಸಂಕೇತ ಬಳಸುವುದರಿಂದ ಮಾಹಿತಿ ವಿನಿಮಯದಲ್ಲಿ ಅಡಚಣೆಯುಂಟಾಗುವುದಿಲ್ಲ. ಇದೊಂದು ಮಾನಕ (standard) ಆಗಿದೆ. ಈ ವಿಧಾನದಲ್ಲಿ ಭಾರತೀಯ ಭಾಷೆಗಳಿಗೆ ಜಾಗವಿಲ್ಲ. ಆದುದರಿಂದ ಈಗ ೧೬ ಬಿಟ್ ಬಳಕೆಯ ಯುನಿಕೋಡ್ ಹೆಚ್ಚಾಗಿ ಮಾನಕವಾಗಿ ಬಳಕೆಯಾಗುತ್ತಿದೆ.

e - ಸಲಹೆ

ವಿಜೇತ ಗೌಡರ ಪ್ರಶ್ನೆ: ನನಗೆ Samsung SGH D780 PC Suite ತಂತ್ರಾಂಶ ಬೇಕು. ಎಲ್ಲಿ ಸಿಗುತ್ತದೆ?
ಉ: bit.ly/hayLRV ಜಾಲತಾಣಕ್ಕೆ ಭೇಟಿ ನೀಡಿ.

ಕಂಪ್ಯೂತರ್ಲೆ

ಗೂಗ್ಲ್‌ನವರು ನಿಘಂಟು ಸವಲತ್ತನ್ನು www.google.com/dictionary ಜಾಲತಾಣದಲ್ಲಿ ನೀಡಿದ್ದಾರೆ. ಇದರಲ್ಲಿ ಇಂಗ್ಲಿಷ್ ಮತ್ತು ಕನ್ನಡ ಮಧ್ಯೆ ಕೆಲವು ಪದಗಳ ಅರ್ಥ ಹುಡುಕಿದಾಗ ದೊರಕಿದ್ದು:
ಕಂದ = bulb
ಸಾರು = announce
ಅನ್ನ = bread
ಊಟ = package holiday (tour)

ಗಣಕಿಂಡಿ - ೦೯೩ (ಫೆಬ್ರವರಿ ೨೮, ೨೦೧೧)

ಅಂತರಜಾಲಾಡಿ

ಕವಿತೆ ನೀನೇಕೆ ಪದಗಳಲ್ಲಿ ಅವಿತೆ

ಕವಿತೆ ಎಲ್ಲರಿಗೂ ಇಷ್ಟ. ದೊಡ್ಡ ಕವನಸಂಗ್ರಹವೊಂದು ಅಂತರಜಾಲದಲ್ಲಿದೆ. ಇದರಲ್ಲಿ ಸಾವಿರಾರು ಕವಿಗಳ ಸಹಸ್ರಾರು ಕವಿತೆಗಳಿವೆ. ಯಾವುದೋ ಒಬ್ಬ ಖ್ಯಾತ ಕವಿಯ ಖ್ಯಾತ ಕವನವೊಂದರ ಸಾಲುಗಳನ್ನು ಎಲ್ಲೋ ಉದ್ಧರಿಸಬೇಕಾಗಿದೆ. ಆಗ ಏನು ಮಾಡುತ್ತೀರಿ? ಈ ಜಾಲತಾಣಕ್ಕೆ ಭೇಟಿ ನೀಡಿ. ನಿಮಗೆ ಬೇಕಾದ ಕವನ ಇಲ್ಲಿ ಸಿಗಲೂ ಬಹುದು. ಕವತೆಗಳಲ್ಲದೆ ಖ್ಯಾತ ಕವಿಗಳ ಮಾತುಗಳೂ, ಖ್ಯಾತ ಹೇಳಿಕೆಗಳೂ ಇಲ್ಲಿವೆ. ಹಲವಾರು ಕವನಗಳ ಸಂಗ್ರಹಗಳು ಪಿಡಿಎಫ್ ರೂಪದಲ್ಲಿ ಡೌನ್‌ಲೋಡ್ ಮಾಡಿಕೊಳ್ಳಲೂ ಲಭ್ಯವಿವೆ. ಗುರುವರ್ಯ ರವೀಂದ್ರನಾಥ ಠಾಗೂರರ ನೋಬೆಲ್ ಪ್ರಶಸ್ತಿ ಪುರಸ್ಕೃತ ಗೀತಾಂಜಲಿ ಕೂಡ ಇಲ್ಲಿದೆ. ಈ ಜಾಲತಾಣದ ವಿಳಾಸ - www.poemhunter.com. 

ಡೌನ್‌ಲೋಡ್

ಶೇರುಮಾರುಕಟ್ಟೆ ವಿವರ

ಶೇರು ಮಾರುಕಟ್ಟೆ ತುಂಬ ಕಲ್ಪನಾತೀತ. ಯಾವ ಕಂಪೆನಿಯ ಶೇರು ಯಾವಾಗ ಮೇಲೆ ಹೋಗುತ್ತದೆ ಯಾವ ಕಂಪೆನಿಯ ಶೇರು ಕೆಳಗೆ ಹೋಗುತ್ತದೆ ಎಂದು ಇದಮಿತ್ಥಂ ಎಂದು ಊಹಿಸಿ ಹೇಳುವುದು ಕಷ್ಟ. ಆದರೂ ಈ ಮಾರುಕಟ್ಟೆಯಲ್ಲಿ ಹಣ ಹೂಡುವವರ ಮತ್ತು ಹಣ ಸಂಪಾದಿಸುವವರ ಸಂಖ್ಯೆ ಏನೂ ಕಡಿಮೆಯಿಲ್ಲ. ಶೇರು ಮಾರುಕಟ್ಟೆಯಲ್ಲಿ ಕಂಪೆನಿಗಳ ಶೇರುಬೆಲೆ ಮೇಲೆಕೆಳಗೆ ಆಗುತ್ತಲೇ ಇರುತ್ತವೆ. ಈ ವಿವರವನ್ನು ಘಳಿಗೆ ಘಳಿಗೆ ತಿಳಿಯಬೇಕೇ? ಅದಕ್ಕಾಗಿ ಹಲವಾರು ಜಾಲತಾಣಗಳಿವೆ. ಅಂತೆಯೇ ಗಣಕದಲ್ಲಿ ಅನಸ್ಥಾಪಿಸಬಲ್ಲ ತಂತ್ರಾಂಶಗಳೂ ಇವೆ. ಅಂತಹ ಒಂದು ತಂತ್ರಾಂಶ JStock. ಇದು ದೊರೆಯುವ ಜಾಲತಾಣ jstock.sourceforge.net. ನಿಮ್ಮಲ್ಲಿರುವ ಶೇರುಗಳ ವಿವರಗಳನ್ನು ದಾಖಲಿಸಿಟ್ಟುಕೊಳ್ಳುವ ಸವಲತ್ತೂ ಇದರಲ್ಲಿದೆ. ಪ್ರಪಂಚದ ೨೫ ದೇಶಗಳ ಶೇರುಮಾರುಕಟ್ಟೆಗಳ ಮೇಲೆ ಇದರ ಮೂಲಕ ಕಣ್ಣಿಡಬಹುದು.

e - ಸುದ್ದಿ

ಫೋನ್ ಮೂಲಕ ತಪ್ಪೊಪ್ಪಿಗೆ

ಕ್ಯಾಥೊಲಿಕ್ ಕ್ರಿಶ್ಚಿಯನ್ ಜನಾಂಗದಲ್ಲಿ ಇಗರ್ಜಿಗೆ ಹೋಗಿ ಪಾದ್ರಿಯ ಮುಂದೆ ತಪ್ಪೊಪ್ಪಿಗೆ ನಿವೇದನೆ ಮಾಡಿಕೊಳ್ಳುವ ಪದ್ಧತಿಯಿದೆ. ಹೀಗೆ ತಪ್ಪೊಪ್ಪಿಗೆ ಮಾಡಿಕೊಳ್ಳಲು ಸಹಾಯ ಮಾಡುವ ಐಫೋನ್ ತಂತ್ರಾಂಶವೊಂದು ಮಾರುಕಟ್ಟೆಗೆ ಬಂದಿದೆ. ಇದು ಹಲವಾರು ಪ್ರಶ್ನೋತ್ತರಗಳ ಮೂಲಕ ವ್ಯಕ್ತಿಯನ್ನು ತಪ್ಪೊಪ್ಪಿಗೆಗೆ ಅನುವು ಮಾಡುತ್ತದೆ. ಅಮೆರಿಕ ಬಿಶಪ್ ಒಬ್ಬರ ಸಹಾಯದಿಂದ ಇದನ್ನು ತಯಾರಿಸಲಾಗಿದೆ. ಆದರೆ ವ್ಯಾಟಿಕನ್ ಪೋಪ್ ಇದನ್ನು ಒಪ್ಪಿಲ್ಲ. ಅವರು ಮಾನವರ ಮೂಲಕವೇ ತಪ್ಪೊಪ್ಪಿಗೆ ಮತ್ತು ಅದಕ್ಕೆ ಸಂಬಂದಪಟ್ಟ ಪ್ರಶ್ನೋತ್ತರಗಳು ನಡೆಯತಕ್ಕದ್ದು ಎಂದಿದ್ದಾರೆ.

e- ಪದ

ಎಚ್‌ಡಿಎಮ್‌ಐ (HDMI - High-Definition Multimedia Interface) - ಡಿಜಿಟಲ್ ವಿಧಾನದಲ್ಲಿ ಧ್ವನಿ ಮತ್ತು ವೀಡಿಯೋ ಮಾಹಿತಿಯನ್ನು ವಿವಿಧ ಸಲಕರಣೆಗಳ ಮೂಲಕ ಒಂದರಿಂದ ಇನ್ನೊಂದಕ್ಕೆ ಪ್ರವಹಿಸಲು ಅನುವು ಮಾಡಿಕೊಡುತ್ತದೆ. ಇತ್ತೀಚೆಗೆ ಮಾರುಕಟ್ಟೆಗೆ ಬರುತ್ತಿರುವ ಹೈಡೆಫಿನಿಶನ್ ಟಿ.ವಿ.ಗಳನ್ನು ಗಣಕಕ್ಕೆ, ಡಿ.ವಿ.ಡಿ/ಬ್ಲೂರೇ ಪ್ಲೇಯರ್‌ಗೆ ಅಥವಾ ಎಕ್ಸ್‌ಬಾಕ್ಸ್‌ಗೆ ಸಂಪರ್ಕಿಸಲು ಇದನ್ನು ಬಳಸುತ್ತಾರೆ. ಇದರ ಮೂಲಕ ಅಧಿಕ ಗುಣಮಟ್ಟದ ವೀಡಿಯೋ ಮಾಹಿತಿ ಸಂವಹನೆ ಮಾಡಬಹುದು. 

e - ಸಲಹೆ

ಪರಶುರಾಮರ ಪ್ರಶ್ನೆ: ನಾನು ಕನ್ನಡ ಯುನಿಕೋಡ್ ಬಳಸುತ್ತಿದ್ದೇನೆ. ಕನ್ನಡ ಅಂಕಿಗಳನ್ನು ಪಡೆಯುವುದು ಹೇಗೆ? ನನ್ನದು ವಿಂಡೋಸ್ ತಂತ್ರಾಂಶ.
ಉ: ವಿಂಡೋಸ್‌ನಲ್ಲಿ ಅಳವಡಿಸಿರುವ ಕೀಲಿಮಣೆಯನ್ನು ಬಳಸಿ. Ctrl ಮತ್ತು  Alt  ಮತ್ತು ಅಂಕಿಯ ಕೀಲಿಗಳನ್ನು ಒಟ್ಟಿಗೆ ಒತ್ತಿ.

ಕಂಪ್ಯೂತರ್ಲೆ

ಭಾರತೀಯ ಅಂಚೆ ಇನ್ನು ಮುಂದೆ ಅಂತರಜಾಲದ ಮೂಲಕ ಸೇವೆ ಒದಗಿಸಲಿದೆ ಎಂಬ ಸುದ್ದಿ ಓದಿದ ಕೋಲ್ಯ, ಆ ಜಾಲತಾಣಕ್ಕೆ ಭೇಟಿ ನೀಡಿ, ಅದರಲ್ಲಿ ಕಂಡುಬಂದ ಸ್ಟಾಂಪ್‌ಗಳು ಎಂಬಲ್ಲಿ ಕ್ಲಿಕ್ ಮಾಡಿ ಪರದೆಯಲ್ಲಿ ಮೂಡಿಬಂದ ಸ್ಟಾಂಪ್‌ನ ಮುಂದೆ ತನ್ನ ಅಂಚೆ ಲಕೋಟೆಯನ್ನು ಒತ್ತಿ ಹಿಡಿದ.