ಬುಧವಾರ, ಸೆಪ್ಟೆಂಬರ್ 16, 2009

ಗಣಕಿಂಡಿ - ೦೧೮ (ಸಪ್ಟಂಬರ್ ೧೪, ೨೦೦೯)

ಅಂತರಜಾಲಾಡಿ

ಪುಸ್ತಕಪ್ರಿಯರಿಗೆ

ಮನುಷ್ಯನನ್ನು ಪರಿಪೂರ್ಣನನ್ನಾಗಿಸುವುದು ಪುಸ್ತಕಗಳ ಓದುವಿಕೆ ಅಂತ ಹಲವಾರು ಪ್ರಾಜ್ಞರು ಹೇಳಿದ್ದಾರೆ. ಅಂತರಜಾಲದಲ್ಲಿ ಪುಸ್ತಕಗಳನ್ನು ಓದಬಲ್ಲ ಜಾಲತಾಣಗಳು ಹಲವಾರಿವೆ. ಪ್ರಾಜೆಕ್ಟ್ ಗುಟೆನ್‌ಬರ್ಗ್ (gutenberg.org) ಅವುಗಳಲ್ಲಿ ತುಂಬ ಪ್ರಖ್ಯಾತ. ಹಕ್ಕುಸ್ವಾಮ್ಯದಿಂದ ಹೊರಬಂದ ಪುಸ್ತಕಗಳನ್ನು ಇಲ್ಲಿಂದ ಉಚಿತವಾಗಿ ಡೌನ್‌ಲೋಡ್ ಮಾಡಿಕೊಳ್ಳಬಹುದು. ಗೂಗ್ಲ್‌ನವರು ಪುಸ್ತಕ ಪ್ರಕಾಶನ ಸಂಸ್ಥೆಗಳು ಮತ್ತು ಲೇಖನರ ಜೊತೆ ಒಪ್ಪಂದ ಮಾಡಿಕೊಂಡು ಇನ್ನೊಂದು ರೀತಿಯ ಸವಲತ್ತು ನೀಡಿದ್ದಾರೆ. ಅದುವೇ ಗೂಗ್ಲ್ ಬುಕ್ಸ್ (books.google.com). ಈ ಜಾಲತಾಣದಲ್ಲಿ ಮಾರಾಟಕ್ಕೆ ದೊರಕುವ, ಉಚಿತವಾಗಿರುವ, ಸ್ಯಾಂಪಲ್ ಪುಟಗಳನ್ನು ಮಾತ್ರ ನೀಡಿರುವ ಪುಸ್ತಕಗಳನ್ನು ಓದಬಹುದು. ಪುಸ್ತಕಗಳನ್ನು ಜಾಲತಾಣದಲ್ಲೇ ಓದಬೇಕು. ಪುಸ್ತವನ್ನು ನಿಮ್ಮ ಗಣಕಕ್ಕೆ ಡೌನ್‌ಲೋಡ್ ಮಾಡಲಾಗುವುದಿಲ್ಲ. ಅಂದರೆ ಪೂರ್ತಿ ಪುಸ್ತಕ ಓದಲು ಅಂತರಜಾಲ ಸಂಪರ್ಕ ನಿರಂತರವಾಗಿರಬೇಕು. ಇದಕ್ಕೆ ಅಪವಾದವೂ ಇವೆ. ಅದು ಹೇಗೆಂದರೆ ಲೇಖಕ ಅಥವಾ ಪ್ರಕಾಶಕರೇ ಡೌನ್‌ಲೋಡ್ ಮಾಡಿಕೊಳ್ಳಬಲ್ಲ ಪಿಡಿಎಫ್ ರೂಪದಲ್ಲಿ ಪುಸ್ತಕವನ್ನು ನೀಡಿರಬೇಕು.

ಡೌನ್‌ಲೋಡ್

ಗೂಗ್ಲ್‌ನಿಂದ ಪುಸ್ತಕ ಡೌನ್‌ಲೋಡ್ ಮಾಡಿ

ಗೂಗ್ಲ್ ಬುಕ್ಸ್ ಜಾಲತಾಣದಿಂದ ಪುಸ್ತಕವನ್ನು ಸಾಮಾನ್ಯವಾಗಿ ಡೌನ್‌ಲೋಡ್ ಮಾಡಿಕೊಳ್ಳಲು ಆಗುವದಿಲ್ಲ. ಆದರೆ ಇಲ್ಲಿಂದ ಪುಸ್ತಗಳನ್ನು ನಿಮ್ಮ ಗಣಕಕ್ಕೆ ಡೌನ್‌ಲೋಡ್ ಮಾಡಲೆಂದೇ ಒಂದು ಉಚಿತ ತಂತ್ರಾಂಶ ಇದೆ. ಅದುವೇ Google Book Downloader (http://bit.ly/bQFoV). ಇದು ಒಂದು ಚಿಕ್ಕ ತಂತ್ರಾಂಶ. ಇದನ್ನು ಬಳಸಿ ಗೂಗ್ಲ್ ಪುಸ್ತಕ ಜಾಲತಾಣದಿಂದ ಎಲ್ಲ ರೀತಿಯ ಪುಸ್ತಗಳನ್ನು ನಿಮ್ಮ ಗಣಕ್ಕೆ ಪಿಡಿಎಫ್ ರೂಪದಲ್ಲಿ ಪ್ರತಿ ಮಾಡಿಕೊಳ್ಳಬಹುದು. ಇದನ್ನು ಬಳಸಲು ಮೈಕ್ರೋಸಾಫ್ಟ್‌ನವರ ಡಾಟ್‌ನೆಟ್ ತಂತ್ರಾಂಶವು ನಿಮ್ಮ ಗಣಕದಲ್ಲಿ ಇರತಕ್ಕದ್ದು. ಹೆಚ್ಚಿನ ವಿವರಗಳು ಜಾಲತಾಣದಲ್ಲಿವೆ. ಇದನ್ನು ಬಳಸಿ ಪೂರ್ತಿ ಪುಸ್ತಕ ಡೌನ್‌ಲೋಡ್ ಮಾಡಲು ದೀರ್ಘ ಕಾಲ ಬೇಕಾಗುತ್ತದೆ.

e - ಸುದ್ದಿ

ದಪ್ಪಕ್ಷರದಲ್ಲಿ ಇಮೈಲ್ ಕಳುಹಿದ್ದಕ್ಕೆ ದಂಡ

ನ್ಯೂಝಿಲ್ಯಾಂಡ್‌ನಿಂದ ಒಂದು ವಿಚಿತ್ರ ವರದಿ ಬಂದಿದೆ. ಒಬ್ಬಾಕೆ ತನ್ನ ಸಹೋದ್ಯೋಗಿಗಳಿಗೆ ಇಂಗ್ಲಿಶ್‌ನ ಕಾಪಿಟಲ್ ಅಕ್ಷರಗಳಲ್ಲಿ ಇಮೈಲ್ ಮಾಡಿದಳು. ಅವಳ ಉದ್ದೇಶವೇನೋ ಒಳ್ಳೆಯದೇ ಆಗಿತ್ತು. ಕಚೇರಿಯ ವಿವಿಧ ಸವಲತ್ತುಗಳನ್ನು ಬಳಸುವಾಗ ಯಾವ ಯಾವ ರೀತಿಯ ಎಚ್ಚರಿಕೆ ವಹಿಸಬೇಕು ಎಂಬುದನ್ನು ಒತ್ತಿ ಹೇಳುವುದು ಆಕೆಯ ಉದ್ದೇಶವಾಗಿತ್ತು. ವಿಷಯಗಳನ್ನು ಒತ್ತಿ ಹೇಳಲು ಆಕೆ ಕ್ಯಾಪಿಟಲ್ ಅಕ್ಷರಗಳನ್ನು ಮಾತ್ರವಲ್ಲ, ದಪ್ಪಕ್ಷರಗಳನ್ನೂ ಬಳಸಿ ಅಲ್ಲಲ್ಲಿ ಅಕ್ಷರಗಳಿಗೆ ಕೆಂಪು ಬಣ್ಣ ಬಳಿದಿದ್ದಳು. ಅಂತರಜಾಲ ಪರಿಭಾಷೆಯಲ್ಲಿ ಕ್ಯಾಪಿಟಲ್ ಅಕ್ಷರಗಳ ಬಳಕೆ ಎಂದರೆ ಬೈಗುಳ ಎಂದರ್ಥ. ಈ ತಪ್ಪಿಗಾಗಿ ಆಕೆಯನ್ನು ಕೆಲಸದಿಂದ ತೆಗೆದುಹಾಕಲಾಯಿತು. ಆಕೆ ನ್ಯಾಯಾಲಯದಲ್ಲಿ ದಾವೆ ಹೂಡಿ ಕಂಪೆನಿಯಿಂದ ತಪ್ಪು ದಂಡವನ್ನು ಪಡೆದಳೆಂದು ಇತ್ತೀಚೆಗೆ ವರದಿಯಾಗಿದೆ.

e- ಪದ

ಬೆಂಕಿಹಚ್ಚುವುದು

ಪ್ಲೇಮಿಂಗ್ (flaming) - ಅಂತರಜಾಲದಲ್ಲಿರುವ ಚರ್ಚಾ ವೇದಿಕೆಗಳಲ್ಲಿ ಸಂದೇಶಗಳನ್ನು ಸೇರಿಸುವಾಗ ಅಥವಾ ಸಂದೇಶಗಳಿಗೆ ಉತ್ತರಿಸುವಾಗ ಇನ್ನೊಬ್ಬರನ್ನು ಅವಹೇಳನ ಮಾಡುವುದು ಅಥವಾ ಕೆಣಕುವುದು. ಉದಾಹರಣೆಗೆ ಒಬ್ಬಾತ ಭಾರತೀಯ ತಂತ್ರಾಂಶಗಳಲ್ಲಿ ಒಂದಾದ ತಮಿಳು ಭಾಷೆಯನ್ನು ಬಳಸುವಾಗ ಕಂಡುಬಂದ ತೊಂದರೆಯನ್ನು ತೋಡಿಕೊಂಡ ಎಂದಿಟ್ಟುಕೊಳ್ಳೋಣ. ಅದನ್ನು ಓದಿದ ಕನ್ನಡಿಗನೊಬ್ಬ ತಮಿಳರನ್ನಾಗಲೀ, ಕಾವೇರಿ ವಿವಾದವನ್ನಾಗಲೀ ಅಲ್ಲಿಗೆ ಎಳೆದು ತಂದು ಜಗಳ ಹುಟ್ಟುಹಾಕುವುದು. ಅದಕ್ಕಾಗಿ ಆತ ಬಳಸಿದ ಸಂದೇಶಕ್ಕೆ ಫ್ಲೇಮಿಂಗ್ ಎಂದು ಕರೆಯುತ್ತಾರೆ. ಸಾಮಾನ್ಯವಾಗಿ ಮಾತುಕತೆ ನಡೆಸುವಾಗ (ಚಾಟ್ ಮಾಡುವಾಗ) ಅಥವಾ ಇಮೈಲ್‌ನಲ್ಲಿ ಇಂಗ್ಲಿಶ್ ಭಾಷೆಯ ಕ್ಯಾಪಿಟಲ್ ಅಕ್ಷರಗಳ ಬಳಕೆ ಮಾಡಿದರೆ ಅದನ್ನು ಬೈಗುಳ ಎಂದು ಮತ್ತು ಫ್ಲೇಮಿಂಗ್‌ನ ಒಂದು ವಿಧಾನ ಎಂದೇ ಪರಿಗಣಿಸಲಾಗುತ್ತದೆ.

e - ಸಲಹೆ

ಡೆಸ್ಕ್‌ಟಾಪ್‌ಗೆ ಇನ್ನೊಂದು ದಾರಿ

ಗಣಕದಲ್ಲಿ ಹಲವಾರು ವಿಂಡೋಗಳನ್ನು ತೆರೆದಿದ್ದಾಗ ಡೆಸ್ಕ್‌ಟಾಪ್‌ಗೆ ನೇರವಾಗಿ ಹೋಗಲು ಒಂದು ಅಡ್ಡದಾರಿಯನ್ನು (ಶಾರ್ಟ್‌ಕಟ್) ಹಿಂದೊಮ್ಮೆ ನೀಡಲಾಗಿತ್ತು (ಗಣಕಿಂಡಿ, ಜೂನ್ ೧, ೨೦೦೯). ಅದನ್ನು ಓದಿದ ನಮ್ಮ ಓದುಗರಲ್ಲೊಬ್ಬರಾದ ಶಿವಶಂಕರ ವಿಷ್ಣು ಯಳವತ್ತಿಯವರು ನನಗೆ ಮರೆತುಹೋಗಿದ್ದ ಇನ್ನೊಂದು ಸರಳ ಉಪಾಯವನ್ನು ನೆನಪಿಸಿದ್ದಾರೆ. ಕೀಲಿಮಣೆಯಲ್ಲಿರುವ ವಿಂಡೋಸ್ ಕೀಲಿಯ ಜೊತೆ D ಅಕ್ಷರದ ಕೀಲಿಯನ್ನು ಒತ್ತಿದರೆ ನೇರವಾಗಿ ಡೆಸ್ಕ್‌ಟಾಪ್‌ಗೆ ಹೋಬಗಹುದು.

ಕಂಪ್ಯೂತರ್ಲೆ

ಕೋಲ್ಯನಲ್ಲಿರುವ ಒಂದು ಸಿ.ಡಿ. ಆತನ ಸ್ನೇಹಿತನಿಗೆ ಬೇಕಾಗಿತ್ತು. ಆತ ಕೋಲ್ಯನಿಗೆ ಅದರ ಪ್ರತಿ ಮಾಡಿ ತೆಗೆದುಕೊಂಡು ಬರಲು ಹೇಳಿದ. ಮರುದಿನ ಸ್ನೇಹಿತನ ಮನೆಯಲ್ಲಿ ಕೋಲ್ಯ ಪ್ರತ್ಯಕ್ಷನಾದ. ಆತನ ಕೈಯಲ್ಲಿ ಏನಿತ್ತು ಗೊತ್ತೆ? ಆತನ ಸಿ.ಡಿ.ಯ ಕ್ಸೆರಾಕ್ಸ್ ಪ್ರತಿ!

ಕಾಮೆಂಟ್‌ಗಳಿಲ್ಲ:

ಕಾಮೆಂಟ್‌‌ ಪೋಸ್ಟ್‌ ಮಾಡಿ