ಸೋಮವಾರ, ಆಗಸ್ಟ್ 10, 2009

ಗಣಕಿಂಡಿ - ೦೧೩ (ಆಗಸ್ಟ್ ೧೦, ೨೦೦೯)

ಅಂತರಜಾಲಾಡಿ

ಮೊಬೈಲ್ ಫೋನನ್ನು ರಿಸೆಟ್ ಮಾಡಿ

ಮೊಬೈಲ್ ಫೋನು ಕೆಲವೊಮ್ಮೆ ಕೈಕೊಡುವುದು ಎಲ್ಲರ ಅನುಭವಕ್ಕೆ ಬಂದಿರುತ್ತದೆ. ಅಂತಹ ಸಂದರ್ಭದಲ್ಲಿ ಅದನ್ನು ಫ್ಯಾಕ್ಟರಿ ಸೆಟ್ಟಿಂಗ್‌ಗೆ ವಾಪಾಸು ತೆಗೆದುಕೊಂಡು ಹೋದರೆ ಬಹುಪಾಲು ಸಂದರ್ಭದಲ್ಲಿ ಸಮಸ್ಯೆ ಪರಿಹಾರವಾಗುತ್ತದೆ. ಮೊಬೈಲ್ ಫೋನುಗಳ ಕೈಪಿಡಿಯಲ್ಲಿ ಈ ಒಂದು ವಿಷಯವನ್ನು ಸರಿಯಾಗಿ ನೀಡಿರುವುದಿಲ್ಲ. ಅದಕ್ಕೆ ಕಾರಣವೂ ಇದೆ. ಈ ರಿಸೆಟ್ ಮಾಡಲು ಜನಸಾಮಾನ್ಯರು ಪ್ರಯತ್ನಿಸಬಾರದು. ಕೇವಲ ಪರಿಣತರು ಮಾತ್ರ ಇದನ್ನು ಮಾಡುವುದು ಸೂಕ್ತ. ನೀವು ಪರಿಣತರಾಗಬಯುಸುತ್ತೀರಾ? ಅಂದರೆ ಫೋನನ್ನು ಫ್ಯಾಕ್ಟರಿ ಸೆಟ್ಟಿಂಗ್‌ಗೆ ರಿಸೆಟ್ ಮಾಡಬಯಸುತ್ತೀರಾ? ಹಾಗಿದ್ದರೆ ಏನು ಮಾಡಬೇಕು? ಜಗತ್ತಿನ ಬಹುತೇಕ ಫೋನುಗಳನ್ನು ರಿಸೆಟ್ ಮಾಡುವುದು ಹೇಗೆ ಎಂದು ವಿವರಿಸುವ ಜಾಲತಾಣ http://bit.ly/q9pWS

ಡೌನ್‌ಲೋಡ್

ಪಾಸ್‌ವರ್ಡ್‌ಗಳಿಗೊಂದು ಪಾಸ್‌ವರ್ಡ್

ಈಗಿನ ದಿನಗಳಲ್ಲಿ ಹಲವಾರು ಜಾಲತಾಣಗಳು, ಇಮೈಲ್, ಪ್ರೋಗ್ರಾಂಗಳು, ಫೋನು, ಎಟಿಎಂ, ಇತ್ಯಾದಿ ಎಲ್ಲ ಕಡೆ ಒಂದೊಂದು ಗುಪ್ತಪದ (ಪಾಸ್‌ವರ್ಡ್) ಬಳಸಬೇಕಾಗುತ್ತದೆ. ಎಲ್ಲ ಕಡೆ ಒಂದೆ ಗುಪ್ತಪದ ಬಳಸುವುದು ಒಳ್ಳೆಯದಲ್ಲ. ಹಲವಾರು ಗುಪ್ತಪದಗಳನ್ನು ನೆನಪಿಟ್ಟುಕೊಳ್ಳುವುದು ಹೇಗೆ? ಅವುಗಳನ್ನು ಎಲ್ಲೂ ಬರೆದಿಟ್ಟುಕೊಳ್ಳಬಾರದು. ಈ ಸಮಸ್ಯೆಗೆ ಪರಿಹಾರ ಕೀಪಾಸ್ ತಂತ್ರಾಂಶ. ಇದು ಬೇಕಿದ್ದರೆ http://bit.ly/166IFl ಜಾಲತಾಣಕ್ಕೆ ಭೇಟಿ ನೀಡಿ. ಎಲ್ಲ ಗುಪ್ತಪದಗಳನ್ನು ಈ ತಂತ್ರಾಂಶದಲ್ಲಿ ಸಂಗ್ರಹಿಸಿ ಇಡಿ. ಇದಕ್ಕೊಂದು ಗುಪ್ತ ಪದ ನೀಡಿ. ನಂತರ ಈ ಒಂದು ಗುಪ್ತಪದವನ್ನು ನೆನಪಿಟ್ಟುಕೊಂಡರೆ ಸಾಕು. ಅಂದ ಹಾಗೆ ಈ ತಂತ್ರಾಂಶದ ಮೊಬೈಲ್ ಫೋನು ಆವೃತ್ತಿಯೂ ಲಭ್ಯವಿದೆ.

e - ಸುದ್ದಿ

ಜಾಲನಾಗರಿಕರು ಸ್ವಲ್ಪ ಎಚ್ಚರವಹಿಸಿದರೆ ಒಳ್ಳೆಯದು

ಇಂಗ್ಲೆಂಡಿನಲ್ಲೊಬ್ಬ ಫೇಸ್‌ಬುಕ್‌ನಲ್ಲಿ ತನ್ನ ಪುಟದಲ್ಲೊಂದು ಜಾಹೀರಾತು ನೀಡಿದ. ಏನೆಂದರೆ ತನ್ನ ತೋಟದಲ್ಲಿ ರಾತ್ರಿಯಿಡೀ ನಡೆಯಲಿರುವ ಪಾರ್ಟಿಗೆ ಬನ್ನಿ ಎಂದು ಆಹ್ವಾನ ಪತ್ರಿಕೆ ಛಾಪಿಸಿದ್ದ. ಆಹ್ವಾನ ಮನ್ನಿಸಿ ಸ್ನೇಹಿತರು ಬಂದರು ಕೂಡ. ಆದರೆ ಜೊತೆಯಲ್ಲಿ ಪೋಲೀಸರೂ ಬಂದು ಪಾರ್ಟಿ ನಡೆಯದಂತೆ ನೋಡಿಕೊಂಡರು. ಯಾಕಪ್ಪಾ ಅಂದರೆ ಇಂಗ್ಲೆಂಡಿನಲ್ಲಿ ರಾತ್ರಿ ಪೂರ್ತಿ ತೆರೆದ ಜಾಗದಲ್ಲಿ ಪಾರ್ಟಿ ನಡೆಸುವಂತಿಲ್ಲ. ಆದುದರಿಂದ ಜಾಲನಾಗರಿಕರು ತಾವು ಏನು ಮಾಡುತ್ತೇವೆ/ಮಾಡಲಿದ್ದೇವೆ ಎಂದು ಅಂತರಜಾಲದಲ್ಲಿ ಘೋಷಿಸುವಾಗ ಎಚ್ಚರವಹಿಸತಕ್ಕದ್ದು.

e- ಪದ

ಜಾಲನಾಗರಿಕ (netizen) - ಅಂತರಜಾಲದಲ್ಲಿ ಸದಾ ಸಕ್ರಿಯನಾಗಿರುವವ. ಅಂತರಜಾಲ ನಾಗರಿಕ ಎನ್ನಬಹುದು. ಮೂಲ ಇಂಗ್ಲಿಶ್‌ನಲ್ಲಿ ಇದು ಇಂಟರ್‌ನೆಟ್ ಮತ್ತು ಸಿಟಿಝನ್ ಎಂಬ ಪದಗಳ ಭಾಗಗಳು ಸೇರಿ ಆಗಿರುವ ಪದ. ಜಾಲನಾಗರಿಕರು ಸಾಮಾನ್ಯವಾಗಿ ಸದಾ ಆನ್‌ಲೈನ್ ಆಗಿರುತ್ತಾರೆ. ಅಂತರಜಾಲದಲ್ಲಿರುವ ಬಹುಪಾಲು ಸೋಶಿಯಲ್ ನೆಟ್‌ವರ್ಕಿಂಗ್ ಜಾಲತಾಣಗಳಲ್ಲಿ (ಉದಾ -ಆರ್ಕುಟ್, ಫೇಸ್‌ಬುಕ್, ಟ್ವಿಟ್ಟರ್...) ಭಾಗವಹಿಸುತ್ತಿರುತ್ತಾರೆ. ಚರ್ಚಾತಾಣಗಳಲ್ಲಿ ನಡೆಯುವ ಚರ್ಚೆಗಳಲ್ಲಿ ಭಾಗವಹಿಸುತ್ತಾರೆ.

e - ಸಲಹೆ

ಮೈಕ್ರೋಸಾಫ್ಟ್ ವರ್ಡ್‌ನಲ್ಲಿ ಆಗಾಗ ಬಳಸುವ ಆದೇಶಕ್ಕೆ ಒಂದು ಶಾರ್ಟ್‌ಕಟ್ ಇದ್ದರೆ ಒಳಿತು ತಾನೆ. ಇದಕ್ಕಾಗಿ ವರ್ಡ್2003 ರಲ್ಲಿ Tools ಮೆನುವಿನಲ್ಲಿ Customize ಅನ್ನು ಆಯ್ಕೆ ಮಾಡಿ (ವರ್ಡ್2007ರಲ್ಲಿ ವರ್ಡ್ ಬಟನ್‌ನಲ್ಲಿ Word Options ನಲ್ಲಿ Customize ಆಯ್ಕೆ ಮಾಡಿ). ಈಗ Keyboard ಬಟನ್ ಕ್ಲಿಕ್ ಮಾಡಿ ನಂತರ ನಿಮಗೆ ಬೇಕಾದ ಆದೇಶಕ್ಕೆ ಬೇಕಾದ ಕೀಲಿಯನ್ನು ಆಯ್ಕೆ ಮಾಡಿ.

ಕಂಪ್ಯೂತರ್ಲೆ

ಆಧುನಿಕ ಗಾದೆಗಳು:
  • ವೆಬ್‌ಕಾಮ್‌ನಲ್ಲಿ ತಂಗಿಯನ್ನು ತೋರಿಸಿ ಅಕ್ಕನನ್ನು ಮದುವೆ ಮಾಡಿದರಂತೆ.
  • ಪ್ರೋಗ್ರಾಂ ಮಾಡಲು ಬಾರದವಳು ಕೀಬೋರ್ಡ್ ಸರಿಯಿಲ್ಲ ಅಂದಳಂತೆ.
  • ಇಂಟರ್‌ನೆಟ್ ದೇವಸ್ಥಾನಕ್ಕೆ ಭೇಟಿ ನೀಡೋಣ ಎಂದರೆ ಬಿಕ್ಷುಕರೆಲ್ಲಿ ಎಂದು ಕೇಳಿದನಂತೆ.
  • ಇಮೈಲಲ್ಲಿ ಹೋದ ಮಾನ ಚಾಟ್‌ನಲ್ಲಿ ಬರುವುದೇ?

1 ಕಾಮೆಂಟ್‌:

  1. Install Add-Kannada button with ur blog. Then u can easily submit ur page to all top Kannada social bookmarking sites & u will get more traffic and visitors.
    Install widget from www.findindia.net

    ಪ್ರತ್ಯುತ್ತರಅಳಿಸಿ