ಬುಧವಾರ, ಸೆಪ್ಟೆಂಬರ್ 14, 2011

ಗಣಕಿಂಡಿ - ೧೨೧ (ಸಪ್ಟಂಬರ್ ೧೨, ೨೦೧೧)

ಅಂತರಜಾಲಾಡಿ

ಪಿಡಿಎಫ್‌ನಿಂದ ಎಕ್ಸೆಲ್‌ಗೆ 

ನಿಮಗೆ ಒಬ್ಬರು ಒಂದು ಪಿಡಿಎಫ್ ಕಡತ ಕಳುಹಿಸುತ್ತಾರೆ. ಅದು ಒಂದು ಅರ್ಜಿ ಆಗಿರುತ್ತದೆ ಅಥವಾ ಒಂದು ಕೋಷ್ಟಕವಾಗಿರುತ್ತದೆ. ಅದನ್ನು ತುಂಬಿಸಿ ಅವರಿಗೆ ವಾಪಾಸು ಕಳುಹಿಸಬೇಕು. ಇಂತಹ ಸಂದರ್ಭದಲ್ಲಿ ಉಪಯೋಗಕ್ಕೆ ಬರುವುದು ಪಿಡಿಎಫ್‌ನಿಂದ ಮೈಕ್ರೋಸಾಫ್ಟ್ ಎಕ್ಸೆಲ್‌ಗೆ ಪೈಲನ್ನು ಬದಲಾಯಿಸುವ ತಂತ್ರಾಂಶ. ಆದರೆ ಅಂತಹ ಬಹುತೇಕ ತಂತ್ರಾಂಶಗಳನ್ನು ಹಣ ಕೊಟ್ಟು ಕೊಳ್ಳಬೇಕು. ಪಿಡಿಎಫ್ ಫೈಲ್‌ಗಳನ್ನು ಎಕ್ಸೆಲ್ ಫೈಲ್‌ಗಳಾಗಿ ಪರಿವರ್ತಿಸಲು ಒಂದು ಜಾಲತಾಣ ಇದೆ. ಅಲ್ಲಿ ನಿಮ್ಮ ಪಿಡಿಎಫ್ ಕಡತವನ್ನು ಸೇರಿಸಿದರೆ ಅದು ಕೆಲವೇ ನಿಮಷಗಳಲ್ಲಿ ಅದನ್ನು ಮೈಕ್ರೋಸಾಫ್ಟ್ ಎಕ್ಸೆಲ್ ಕಡತವಾಗಿ ಪರಿವರ್ತಿಸಿ ನೀಡುತ್ತದೆ. ಆ ಜಾಲತಾಣದ ವಿಳಾಸ - www.pdftoexcelonline.com. ನಿಮಗೆ ಆ ತಂತ್ರಾಂಶವನ್ನು ಕೊಂಡುಕೊಳ್ಳಬೇಕು ಎಂದೆನಿಸಿದರೆ ಇದೇ ಜಾಲತಾಣದಿಂದ ಕೊಳ್ಳಬಹುದು.

ಡೌನ್‌ಲೋಡ್

ರಸಾಯನಶಾಸ್ತ್ರಜ್ಞರಿಗೆ

ರಸಾಯನಶಾಸ್ತ್ರದಲ್ಲಿ ಒಂದು ಪ್ರಮುಖ ವಿಷಯ ಅಣುಗಳ ರಚನೆ ಮತ್ತು ಅವುಗಳನ್ನು ತೋರಿಸುವುದು. ಕಾಗದದಲ್ಲಿ ಹಲವು ವಿಧದಲ್ಲಿ ಸೂತ್ರ ಪ್ರಕಾರ ಅಣು ರಚನೆಗಳನ್ನು ತೋರಿಸಬಹುದು. ಆದರೂ ಕೆಲವು ಸಂದರ್ಭಗಳಲ್ಲಿ ಮೂರು ಆಯಾಮದಲ್ಲಿ ಅವುಗಳನ್ನು ಮೂಡಿಸಿದರೇ ಅದು ಹೆಚ್ಚು ಸ್ಪಷ್ಟವಾಗುವುದು. ಅಣುಗಳ ರಚನೆಯನ್ನು ಗಣಕದಲ್ಲಿ ತಯಾರಿಸಲು ಅನುವು ಮಾಡಿಕೊಡುವ ತಂತ್ರಾಂಶ Chemitorium. ಪರಮಾಣುಗಳನ್ನು ಬಳಸಿ ಅಣುಗಳ ರಚನೆಯನ್ನು ಮೂಡಿಸಲು ಇದು ಸಹಾಯಮಾಡುತ್ತದೆ. ಸಾಮಾನ್ಯ ಅಣುಗಳ ರಚನೆ ಅದಕ್ಕೆ ಮೊದಲೇ ಗೊತ್ತಿರುತ್ತದೆ. ಪರಮಾಣುಗಳನ್ನು ತಂದು ಜೋಡಿಸಿದರೆ ಸಾಕು. ಮೂಡಿದ ರಚನೆಯನ್ನು ಮೂರು ಆಯಾಮಗಳಲ್ಲಿ ನೋಡಬಹುದು. ಅದನ್ನು ವಿವಿಧ ಕೋನಗಳಲ್ಲಿ ತಿರುಗಿಸಬಹುದು ಹಾಗೂ ಇತರೆ ತಂತ್ರಾಂಶಗಳಿಗೆ ರಫ್ತು ಮಾಡಬಹುದು. ಈ ತಂತ್ರಾಂಶ ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ bit.ly/rnwx03. ವಿದ್ಯಾರ್ಥಿಗಳಿಗೂ ಅಧ್ಯಾಪಕರಿಗೂ ಉಪಯುಕ್ತ ತಂತ್ರಾಂಶ.

e - ಸುದ್ದಿ

ಸುಳ್ಳು ತಂತ್ರಾಂಶಕ್ಕೆ ದಂಡ

ಸಾಮಾನ್ಯವಾಗಿ ಗುಣವಾಗದ ಖಾಯಿಲೆಗಳನ್ನು ಗುಣ ಮಾಡುತ್ತೇವೆ ಎಂದು ಜಾಹೀರಾತು ನೋಡಿರುತ್ತೀರಿ. ಅದೇ ರೀತಿ ಐಫೋನ್ ಮೂಲಕ ಮೊಡವೆಗಳನ್ನು ಗುಣ ಮಾಡುತ್ತೇವೆ ಎಂದು ಎರಡು ಕಂಪೆನಿಗಳು ಜಾಹೀರಾತು ನೀಡಿ ಅವುಗಳನ್ನು ಮಾರಿ ದುಡ್ಡು ಮಾಡುತ್ತಿದ್ದವು. ಅವರ ಪ್ರಕಾರ ಐಫೋನ್‌ನ ಪರದೆಯಿಂದ ಕೆಲವು ವಿಶಿಷ್ಟ ಬಣ್ಣದ ಬೆಳಕುಗಳನ್ನು ಹೊಮ್ಮಿಸಿ ಅದನ್ನು ಮೊಡವೆ ಇರುವ ಪ್ರದೇಶದ ಮೇಲೆ ಬೀಳಿಸಿದರೆ ಮೊಡವೆ ಗುಣವಾಗುತ್ತದೆ. ಇದನ್ನು ಪ್ರಯೋಗಶಾಲೆಯಲ್ಲಿ ಪರಿಶೀಲಿಸಿ ಇದು ಸುಳ್ಳು ಜಾಹೀರಾತು ಎಂದು ಸರಕಾರವು ನಿರ್ಧರಿಸಿತು. ಅಂತೆಯೇ ಕಂಪೆನಿಗಳಿಗೆ ತಿಳಿಸಿ ಆ ತಂತ್ರಾಂಶಗಳನ್ನು ಮಾರುಕಟ್ಟೆಯಿಂದ ವಾಪಾಸು ಪಡೆಯಲಾಯಿತು ಮತ್ತು ಕಂಪೆನಿಗಳಿಗೆ ದಂಡ ವಿಧಿಸಲಾಯಿತು. ನಮ್ಮ ದೇಶದಲ್ಲಿ?   
 
e- ಪದ

ದತ್ತ (data) - ಗಣಕಗಳಲ್ಲಿ ದಾಖಲಿಸುವ ಹಾಗೂ ಸಂಗ್ರಹಿಸುವ ಮಾಹಿತಿ. ಸಾಮಾನ್ಯವಾಗಿ ಈ ಪದವನ್ನು ಪಠ್ಯವಲ್ಲದ ದ್ವಿಮಾನ ಅಂಕೀಯ ಮಾಹಿತಿಯ ಬಗ್ಗೆ ಹೇಳುವಾಗ ಬಳಸುತ್ತಾರೆ. ಗಣಕಕ್ಕೆ ನೀಡುವ ಆದೇಶಗುಚ್ಛಕ್ಕೆ ಪ್ರೋಗ್ರಾಮ್ (ಕ್ರಮವಿಧಿ) ಎನ್ನುತ್ತಾರೆ. ಕ್ರಮವಿಧಿಯು ದತ್ತವನ್ನು ಬಳಸಿ ಕ್ರಮವಿಧಿಯಲ್ಲಿ ನೀಡಿದ ಸೂತ್ರಗಳ ಪ್ರಕಾರ ಕೆಲಸ ಮಾಡಿ ದತ್ತವನ್ನು ಸಂಸ್ಕರಿಸಿ ದೊರೆತ ಮಾಹಿತಿಯನ್ನು ಹೊರನೀಡುತ್ತದೆ.

e - ಸಲಹೆ

ಪ್ರವೀಣರ ಪ್ರಶ್ನೆ: ನಾನು ಯಾವುದೇ ತಂತ್ರಾಂಶದಲ್ಲಿ ನಕಲು ಮಾಡಿ ಅಂಟಿಸುವಾಗ (copy and paste) “file integrity violated” ಎಂಬ ದೋಷಸಂದೇಶ ಬರುತ್ತಿದೆ. ಇದಕ್ಕೇನು ಪರಿಹಾರ?
ಉ: ಬಹುಶಃ ನೀವು teracopy ಎಂಬ ತಂತ್ರಾಂಶವನ್ನು ಬಳಸುತ್ತಿರಬೇಕು. ಅದನ್ನು ತೆಗೆದುಹಾಕಿ ಪ್ರಯತ್ನಿಸಿ.

ಕಂಪ್ಯೂತರ್ಲೆ

ಕೋಲ್ಯ ಉವಾಚ: ಈ ಅಣ್ಣಾ ಹಜಾರೆಯವರ ಭ್ರಷ್ಟಾಚಾರ ವಿರೋಧ ಆಂದೋಲನ ತುಂಬ ಅತಿಯಾಯಿತು. ನನ್ನ ಕಂಪ್ಯೂಟರ್‌ನಲ್ಲಿ ಯಾವ ಫೈಲ್ ತೆರೆಯಲು ಹೊರಟರೂ “file corrupted” ಎಂದು ಹೇಳುತ್ತಿದೆ.

2 ಕಾಮೆಂಟ್‌ಗಳು:

  1. pls suggest some website that give details of vacancies in differnt banks such as SBI , SBM , Canara bank etc and other sector of government jobs.

    is there any e-paper which tells about employment news ( especially local government as well as central government )

    ಪ್ರತ್ಯುತ್ತರಅಳಿಸಿ
  2. Sharath

    http://www.freejobalert.com

    http://www.sarkarinaukri.net/

    ee link nalli nimma email id nondhisi, nimmage hosa kelasa mahiti siguthade..........

    ಪ್ರತ್ಯುತ್ತರಅಳಿಸಿ