ಸೋಮವಾರ, ಜನವರಿ 2, 2012

ಗಣಕಿಂಡಿ - ೧೩೭ (ಜನವರಿ ೦೨, ೨೦೧೨)

ಅಂತರಜಾಲಾಡಿ

ಅಂತಾರಾಷ್ಟ್ರೀಯ ಸಹಕಾರಿ ವರ್ಷ

ವಿಶ್ವ ಸಂಸ್ಥೆಯು ಪ್ರತಿ ವರ್ಷ ಒಂದು ಸಾಮಾಜಿಕ ಬದ್ಧತಯೆ ವಿಷಯವನ್ನು ಎತ್ತಿಕೊಂಡು ಇಡಿಯ ವರ್ಷವನ್ನು ಆ ವಿಷಯದ ವರ್ಷ ಎಂದು ಘೋಷಿಸುತ್ತದೆ. ಅದೇ ರೀತಿ ೨೦೧೨ನ್ನು ಅಂತಾರಾಷ್ಟ್ರೀಯ ಸಹಕಾರಿ ವರ್ಷ ಎಂದು ಘೋಷಿಸಿದೆ. ಸಹಕಾರಿ ಕ್ಷೇತ್ರದ ಬಗ್ಗೆ ಜನರಿಗೆ ತಿಳಿವಳಿಕೆ ಮೂಡಿಸುವುದು, ಸಹಕಾರಿ ಸಂಸ್ಥೆಗಳ ಮೂಲಕ ಎಲ್ಲ ರಂಗ ಹಾಗೂ ಹಂತಗಳಲ್ಲಿ ಉದ್ಯೋಗ ಸೃಷ್ಠಿಗೆ ಪ್ರೋತ್ಸಾಹ ನೀಡುವುದು, ಬಡತನ ನಿರ್ಮೂಲನ -ಇತ್ಯಾದಿಗಳನ್ನೆಲ್ಲ ಸಾಧಿಸುವುದು ಈ ವರ್ಷದ ಆಶಯ. ಈ ಎಲ್ಲ ಕೆಲಸಗಳಿಗೆ ಸಹಾಯಕಾರಿಯಾಗಿವಂತೆ ಅಂತಾರಾಷ್ಟ್ರೀಯ ಸಹಕಾರಿ ವರ್ಷ ೨೦೧೨ ಎಂದು ಧ್ಯೇಯವಾಕ್ಯವಾಗಿರುವ ಜಾಲತಾಣ www.2012.coop. ಸಹಕಾರಿ ರಂಗದ ಸಾಧನೆಗಳ ಪರಿಚಯ, ಕಥೆಗಳು, ಸ್ಪರ್ಧೆಗಳು -ಎಲ್ಲ ಈ ಜಾಲತಾಣದಲ್ಲಿವೆ.

ಡೌನ್‌ಲೋಡ್

ಆಂಡ್ರೋಯಿಡ್‌ಗೆ ಕನ್ನಡ ನಿಘಂಟು

ಮೊಬೈಲ್ ಫೋನ್ ಮತ್ತು ಟ್ಯಾಬ್ಲೆಟ್‌ಗಳಲ್ಲಿ ಈಗ ಜನಪ್ರಿಯತೆಯಲ್ಲಿ ಮೊದಲನೆಯ ಸ್ಥಾನದಲ್ಲಿರುವುದು ಆಂಡ್ರೋಯಿಡ್ ಕಾರ್ಯಾಚರಣೆಯ ವ್ಯವಸ್ಥೆ. ಈ ಕಾರ್ಯಾಚರಣ ವ್ಯವಸ್ಥೆಯಲ್ಲಿ ಕೆಲಸ ಮಾಡುವ ಲಕ್ಷಗಟ್ಟಳೆ ತಂತ್ರಾಂಶಗಳು ಆಂಡ್ರೋಯಿಡ್ ಮಾರುಕಟ್ಟೆಯಲ್ಲಿ (market.android.com) ಲಭ್ಯವಿವೆ. ಈ ಪಟ್ಟಿಗೆ ಇತ್ತೀಚೆಗೆ ಸೇರ್ಪಡೆಯಾಗಿರುವುದು ಇಂಗ್ಲಿಶ್-ಕನ್ನಡ ನಿಘಂಟು. ಇದರಲ್ಲಿ ಸುಮಾರು ೨೫,೦೦೦ ಪದಗಳಿವೆ. ಇದು ಉಚಿತವಾಗಿ ಲಭ್ಯವಿದೆ. ಆಂಡ್ರೋಯಿಡ್ ಮಾರುಕಟ್ಟೆಗೆ ಭೇಟಿ ನೀಡಿ ಇದನ್ನು ಹುಡುಕಬಹುದು. ನೇರವಾದ ಕೊಂಡಿ ಬೇಕಿದ್ದರೆ bit.ly/sRs0B0 ಎಂದು ಟೈಪಿಸಿ. ಇದು ಲಭ್ಯವಾಗುವಂತೆ ಮಾಡಿದ್ದು ಎಂ. ಆರ್ ಶಂಕರ್. ಒಂದು ವಿಶ್ವವಿದ್ಯಾಲಯ ಅಥವಾ ಸರಕಾರ ಮಾಡಬೇಕಿದ್ದ ಕೆಲಸ ಇದು. 

e - ಸುದ್ದಿ

ಕುರ್ಚಿ ಉಸ್ತುವಾರಿಗೆ ಜನ ಬೇಕಾಗಿದೆ

ಇದು ಅಂತಿಂತಹ ಕುರ್ಚಿ ಅಲ್ಲ. ಪ್ರಪಂಚದಲ್ಲಿ ಇಂತಹ ಕುರ್ಚಿ ಇರುವುದು ಬಹುಶಃ ಇದೊಂದೆ. ಇದನ್ನು ನೋಡಿಕೊಳ್ಳುವ ತಂತ್ರಜ್ಞಾನ ಪರಿಣತೆ ನಿಮಗಿದ್ದರೆ ಈ ಕೆಲಸ ನಿಮಗಾಗಿ. ಸಂಬಳವೂ ಕಡಿಮೆಯೇನಿಲ್ಲ. ಸುಮಾರು ೨೫,೦೦೦ ಬ್ರಿಟಿಶ್ ಪೌಂಡ್‌ಗಳು ಅಂದರೆ ಸುಮಾರು ೨೦ ಲಕ್ಷ ರೂಪಾಯಿಗಳು. ಈ ಕುರ್ಚಿಯ ವೈಶಿಷ್ಟ್ಯವೇನೆಂದರೆ ಇದು ಗಣಕ ನಿಯಂತ್ರಿತ. ಇದು ಅಂತರಜಾಲಕ್ಕೆ ನೇರವಾಗಿ ಸಂಪರ್ಕಿಸಬಲ್ಲುದು. ಇದಕ್ಕೆ ಗಾಲಿಗಳಿವೆ. ಇದರ ಚಲನೆಯನ್ನು ಕುರ್ಚಿಯಲ್ಲಿ ಕುಳಿತವನ ಆಲೋಚನೆಯಿಂದಲೇ ನಿಯಂತ್ರಿಸಬಹುದು. ಅದರಲ್ಲಿ ಅಡಕವಾಗಿರುವ ಸ್ಪೀಕರ್ ಕುರ್ಚಿಯ ಯಜಮಾನನ ತುಟಿ ಅಲುಗಾಟವನ್ನು ಅರ್ಥೈಸಿಕೊಂಡು ಅದರಂತೆ ಧ್ವನಿ ಹೊರಡಿಸಬಲ್ಲುದು. ಈಗ ಅರ್ಥವಾಗಿರಬಹುದಲ್ಲವೇ ಈ ಕುರ್ಚಿ ಯಾರಿಗೆ ಸೇರಿದ್ದು ಎಂದು? ಪ್ರಪಂಚದಲ್ಲಿ ಈಗ ಜೀವಂತ ಇರುವ ವ್ಯಕ್ತಿಗಳಲ್ಲಿ ಅತ್ಯಂತ ಬುದ್ಧಿವಂತ ಎಂದು ಕೆಲವರು ಹೇಳುವ ಸ್ಟೀಫನ್ ಹಾಕಿಂಗ್ ಅವರ ಕುರ್ಚಿ ಇದು. ಅವರ ಜಾಲತಾಣದಲ್ಲಿ (www.hawking.org.uk) ಈ ಬಗ್ಗೆ ಜಾಹೀರಾತು ಓದಬಹುದು.        

e- ಪದ

ಸಮಾಜ ಜಾಲತಾಣ (ಸಾಮಾಜಿಕ ಜಾಲತಾಣ) (social networking site) - ತನ್ನ ವೈಯಕ್ತಿಕ ವಿವರಗಳನ್ನು ಸಾರ್ವಜನಿಕವಾಗಿ ದಾಖಲಿಸಿ ಒಬ್ಬರಿನ್ನೊಬ್ಬರೊಡನೆ ಸಂಪರ್ಕ ಸಾಧಿಸಿ ಅದರ ಮೂಲಕ ಸಾಮಾಜಿಕ ಸಂಪರ್ಕಗಳ ಜಾಲಗಳನ್ನು ನಡೆಸಲು ಅನುವು ಮಾಡಿಕೊಡುವ ಜಾಲತಾಣ. ಫೇಸ್‌ಬುಕ್ ಇದಕ್ಕೆ ಉತ್ತಮ ಉದಾಹರಣೆ. ತಮ್ಮದೇ ಪ್ರತ್ಯೇಕ ಪಂಗಡಗಳನ್ನು ನಿರ್ಮಿಸಲು ಇದು ಅನುವು ಮಾಡಿಕೊಡುತ್ತದೆ. ಫೇಸ್‌ಬುಕ್ ಒಂದು ರಾಷ್ಟ್ರ ಎಂದು ಪರಿಗಣಿಸುವುದಾದರೆ ಇದು ಜಗತ್ತಿನ ಮೂರನೆ ಅತಿ ಹೆಚ್ಚು ಜನಸಂಖ್ಯೆಯ ದೇಶವಾಗುತ್ತಿತ್ತು.

e - ಸಲಹೆ

ಮಹೇಶ ಜೊನ್ನಗಿರಿಮಠ ಅವರ ಪ್ರಶ್ನೆ: ನನಗೆ ಯುಟ್ಯೂಬ್‌ನಲ್ಲಿ ಪ್ರಸಾರವಾಗುವ ಟ್ಯುಟೋರಿಯಲ್ ವೀಡಿಯೋಗಳನ್ನು ಡೌನ್‌ಲೋಡ್ ಮಾಡಿಕೊಂಡ್ ಮತ್ತೆ ಮತ್ತೆ ನೋಡಬೇಕು. ಅದಕ್ಕೆ ಅನುವುಮಾಡಿಕೊಡುವ ತಂತ್ರಾಂಶ ಇದೆಯೇ?
ಉ: ಈ ಬಗ್ಗೆ ಇದೇ ಅಂಕಣದಲ್ಲಿ ಹಲವು ಬಾರಿ ಉತ್ತರಿಸಲಾಗಿದೆ. ನೀವು ಯುಟ್ಯೂಬ್ ಡೌನ್‌ಲೋಡರ್ ತಂತ್ರಾಂಶವನ್ನು bit.ly/oRMpZ ಜಾಲತಾಣದಿಂದ ಡೌನ್‌ಲೋಡ್ ಮಾಡಿಕೊಂಡು ಬಳಸಿ.

ಕಂಪ್ಯೂತರ್ಲೆ

ಆಧುನಿಕ ವೈವಾಹಿಕ ಜಾಹೀರಾತು

ಬೆಂಗಳೂರಿನಲ್ಲಿ ಸಾಫ್ಟ್‌ವೇರ್ ಪರಿಣತನಾಗಿರುವ ಮೊದಲನೆಯ ಸಲ ಮದುವೆಯಾಗುತ್ತಿರುವ ಸ್ಫುರದ್ರೂಪಿ ವರನಿಗೆ ವಧು ಬೇಕಾಗಿದೆ. ಹುಡುಗಿ ಸಾಫ್ಟ್‌ವೇರ್ ಕ್ಷೇತ್ರದಲ್ಲಿ ಕೆಲಸದಲ್ಲಿದ್ದು ಮೊದಲನೆಯ ಸಲ ವಿವಾಹವಾಗುತ್ತಿರುವವಳಾಗಿರಬೇಕು. ಹುಡುಗಿಯ ವಿವರಗಳನ್ನು ಫೋಟೋಶಾಪ್ ಮಾಡದ ಫೋಟೋ ಸಹಿತ ಇಮೈಲ್ ಮೂಲಕ ಕಳುಹಿಸಿಕೊಡಿ.

3 ಕಾಮೆಂಟ್‌ಗಳು:

  1. https://market.android.com/details?id=com.sathish.kannadaWiki&feature=search_result#?t=W251bGwsMSwxLDEsImNvbS5zYXRoaXNoLmthbm5hZGFXaWtpIl0.

    Kannada wiki - another dictionary in the market already!!

    ಪ್ರತ್ಯುತ್ತರಅಳಿಸಿ
  2. e - ಸಲಹೆಯಲ್ಲಿ ತಿಳಿಸಿರುವಂತೆ, Youtube downloader ಗಿಂತ www.keepvid.com ನಲ್ಲಿ ಡೌನ್ ಲೋಡ್ ಮಾಡಿದರೆ, ನಾವು ವೀಡಿಯೋಗಳನ್ನು ಹಲವಾರು format ಗಳಲ್ಲಿ ಅಂದರೆ, flv low quality, high quality, mp4 quality, 3gp quality, mp3 ಹೀಗೆ ನಾನಾ ವಿದಧ ಫಾರ್ಮಾಟ್ ಗಳಲ್ಲಿ ಡೌನ್ ಲೋಡ್ ಮಾಡಬಹುದು..

    ಶಿವಶಂಕರ ವಿಷ್ಣು ಯಳವತ್ತಿ

    ಪ್ರತ್ಯುತ್ತರಅಳಿಸಿ